សៀមរាប៖ ក្បួនដង្ហែអង្គរសង្រ្កាន្តឆ្នាំ២០២៣ ត្រូវបានរៀបចំឡើង​សម្រាប់​ធ្វើ​ការ​គាំទ្រ​ដល់​ចក្ខុ​វិស័យ​រួម​របស់ព្រឹត្តិការណ៍អង្គរសង្រ្កាន្ត និងបង្កើតទស្សនីយភាព នៃការ​ចូលរួម​រវាង​សិល្បករៈ​យុវជន​ទាំង​ខ្មែរ និងបរទេស ព្រមទាំងប្រជាពលរដ្ឋក្នុងការដើរជាក្បួន ដោយមាន​បែងចែក​ផែន​ប្រកប​ដោយអត្ថន័យ ហើយក៏មាន​ការ​បន្ថែម​នូវ​គំនិត​ច្នៃ​ប្រឌិត​ក្នុង​ការតុបតែង​ក្បួន​ដង្ហែ​ឱ្យ​មាន​ភាព​ស្រស់​ស្អាត និងទាក់ទាញផងដែរ។

ក្បួនដង្ហែរនាល្ងាចនេះត្រូវបានបែងចែកជា ៤ផែនសំខាន់ៗរួមមាន ផែនទី១ មានឈ្មោះថា អធិបតេយ្យ និងសន្តិភាព ក្នុងក្បួននេះរួមដំណើរដោយ ស្គរជ័យ ចាប៉ីដងវែង ស្នែង តួអង្គនិមិត្ត​រូប​អង្គរ​សង្រ្កាន្ត រថយន្តសបុស្បុកទី០១ "អរគុណសន្តិភាព" ព្រមទាំងរបាំនានាជាច្រើនប្រភេទ។ 

ផែន​ទី​០២ មានឈ្មោះថា ការរួបរួមគ្នា គ្រួសារខ្មែរ ដែលមានរួមបញ្ចូលរបាំត្រុដិ យុវតី និង​យុវជន​ដង្ហែរ​ស្លាក សួស្ដីឆ្នាំថ្មី រថយន្តបុស្បុកទី០២ "ខេមរា ជានានុជន សិរីសន្តីមង្គលា" តាមដោយ​ក្បួន​ដង្ហែរ​យុវជន​សាកលវិទ្យាល័យ ក្បួនដង្ហែរក្រុមការងារដែលចូលរួមព្រឹត្តិការណ៍។ ផែនទី០៣ ឈ្មោះថា ផែនសុទិដ្ឋិនិយមលើអនាគត" ដែល​អម​ដោយ​ក្រុម​របាំ​ប្រពៃណី​បង្ហាញ​ពី​ពិពិធភាព​នៃ​ភូមិសាស្រ្ត​វប្បធម៌កម្ពុជា។ ចំណែកផែនទី០៤ មានឈ្មោះថា មូលធនប្រជាជាតិ​ដែលរួម​ដំណើរ​ដោយ​ព្រុហយាត្រាយុវជនកម្ពុជា រថយន្តបុស្បុកទី០៣ "ការពារអនាគតកម្ពុជា"។

សូមជម្រាបដែរថា កម្មវិធីក្បួនដង្ហែរព្រឹត្តិការណ៍អង្គរសង្រ្កាន្តឆ្នាំ២០២៣ បាន​ប្រព្រឹត្ត​ទៅ​នៅ​រសៀល​ថ្ងៃ​ទី១៥ ខែមេសា ឆ្នាំ២០២៣ នៅបរិវេណលានជល់ដំរី៕