ភ្នំពេញ ៖ ប្រជាពលរដ្ឋនៅរាជធានៅភ្នំពេញ បានថ្លែងនូវការសប្បាយរីករាយ និងការធ្វើបុណ្យទាន ជាពិសេស​នៅក្នុង​ឱកាសបុណ្យចូលឆ្នាំខ្មែរប្រពៃណីជាតិនៅក្នុងឆ្នាំនេះ បានប្រព្រឹត្តទៅដោយរលូន បន្ទាប់រាជរដ្ឋាភិបាល​បានទប់ស្កាត់​ជំងឺកូវីដ ១៩ ប្រកដោយប្រសិទ្ធភាព ជាពិសេសស្ថិតនៅ​ក្រោម​ម្លប់នៃសន្តិភាពដ៏ត្រជាក់ត្រជុំ។

​ប្រជាពលរដ្ឋនៅរាជធានីភ្នំពេញ បានលើកឡើងនៅកិច្ចសម្ភាសន៍ជាមួយភ្នាក់ងារអ្នកយកព័ត៌មាន BTV ទី៣ ក្នុងថ្ងៃបុណ្យចូលឆ្នាំខ្មែរប្រពៃណីជាតិ នៅថ្ងៃទី ១៦ ខែមេសា ឆ្នាំ​២០២៣ នេះថា បន្ទាប់ពីវិបត្តិនៃការរីករាល​ដាលជំងឺកូវីដ ១៩ បានផ្ទុះឡើងនាពេលកន្លងមកនេះ ប្រជាពលរដ្ឋ មិនថានៅរាជធានីភ្នំពេញ ឬនៅតាមជនបទ​ឡើយ គឺមិនបានធ្វើបុណ្យជួបជុំគ្នាដូចក្នុងឆ្នាំនេះឡើយ ក្នុងនោះមានប្រជាពលរដ្ឋមួយចំនួន បានធ្វើបុណ្យឧទិស្ទនៅ​តាមគេហដ្ឋាន និងមួយចំនួនទៀត បានយកបាយសម្លរ នំចំណី ទៅប្រគេនព្រះសង្ឃ ដោយមិនមានលក្ខណៈ​ប្រមូលផ្តុំគ្នានោះឡើយ។

ប្រជាពលរដ្ឋទាំងនេះ បានលើកឡើងស្រដៀងគ្នាទៀត ស្របពេលវិបត្តិនៃការផ្ទុះរីករាលដាលជំងឺកូវីដ ១៩ ឃើញថា រាជរដ្ឋាភិបាលបានយកចិត្តទុកដាក់យ៉ាងខ្លាំង ក្នុងការទប់ស្កាត់ និងប្រយុទ្ធប្រឆាំង ដោយបានធ្វើឲ្យស្ថានភាព​នៃវិបត្តិនេះបានវិលត្រឡប់មករកប្រក្រតីភាពឡើងវិញ ជាក់ស្តែងនៅក្នុងឱកាសបុណ្យ​ចូលឆ្នាំខ្មែរប្រពៃណីជាតិ​ក្នុងឆ្នាំនេះ បានដំណើរការទៅដោយរលូន ជាពិសេសកម្ពុជាការរៀបចំព្រឹត្តិការណ៍មហាសង្គ្រាន្តនៅខេត្តសៀមរាប តាមបណ្តាខេត្តនានា និងនៅតាមទីវត្តអារាមជាដើម និងធ្វើបុណ្យទានឧទិស្ទដល់បុព្វការីជន សាច់សារលោហិត ដែលបានបែកបាក់ចែកឋានទៅកាន់វារៈលោកខាងមុខ និងការដើរកម្សាន្តរបស់ប្រជាពលរដ្ឋ ក៏ដូចភ្ញៀវទេសចរណ៍​នៅពេលនេះ ប្រកបដោយប្រក្រតីភាពខ្ពស់ ប្រជាពលរដ្ឋពិតជាចង់ចាំមិនភ្លេច អំពីការគិតគូរយកចិត្តទុកដាក់​របស់រាជរដ្ឋាភិបាល ក្នុងការប្រយុទ្ធប្រឆាំង និងទប់ស្កាត់ការរីករាលដាលជំងឺកូវីដ ១៩ ឲ្យវិលត្រឡប់​ទៅដូចដើមវិញជាធម្មតា ស្ថិតក្រោមម្លប់សន្តិភាពដ៏ត្រជាក់ត្រជុំ។

សូមបញ្ជាក់ថា៖ តាមទំនៀមទម្លាប់ បុណ្យចូលឆ្នាំខ្មែរប្រពៃណីជាតិ ត្រូវរៀបចំឡើងរយៈពេល៣ថ្ងៃ ដោយមានការ​​ប្រារព្ធកម្មវិធីទៅតាមថ្ងៃនីមួយៗ។ មុនថ្ងៃចូលឆ្នាំមកដល់ ប្រជាពលរដ្ឋបានរៀបចំផ្ទះសម្បែង ទិញសម្លៀកបំពាក់ថ្មី និងរៀបចំសម្ភារទុកជូនដល់ឪពុម្ដាយ ជីដូនជីតាទៀតផង។ តាំងពីបុរាណកាលមក នៅថ្ងៃទី ១ នៃពិធីបុណ្យចូលឆ្នាំថ្មី គេឲ្យឈ្មោះថា ថ្ងៃសង្ក្រាន្ត ដែលប្រជាពលរដ្ឋ តែងតែរៀបចំគ្រឿងសក្ការ ដើម្បីទទួលទេវតា។ ក្រោយពីរៀបចំកម្មវិធីបួងសួងដល់ទេវតាឆ្នាំថ្មីហើយ ជាទំលាប់ប្រជាពលរដ្ឋខ្មែរ នាំគ្នាទៅវត្តរបាប់បាត្រ បង្សុកូល ពូនភ្នំខ្សាច់ និងស្តាប់ធម៌ទេសនា។ ចំណែកថ្ងៃទី២ ប្រជាពលរដ្ឋឲ្យឈ្មោះថា ថ្ងៃវារវ័នប័ត ដែលពលរដ្ឋខ្មែររៀបចំជូន​ទេយ្យវត្ថុ ដល់លោកអ្នកមានគុណ ចែកទានដល់អ្នកទ័លក្រ និងនាំគ្នាទៅវត្តដូចថ្ងៃទី១ ។ ដោយឡែកថ្ងៃចុងក្រោយ នៃពិធីបុណ្យចូលឆ្នាំខ្មែរ គេហៅថាថ្ងៃឡើងសក្តិ តាមទំនៀមទំលាប់ខ្មែរ គេនាំគ្នាទៅឆ្លងបុណ្យនៅវត្ត ដើម្បីរាប់បាត្រ បង្សុកូល ពូនភ្នំខ្សាច់ ស្តាប់ធម៌ទេសនា និងជាពិសេស គឺធ្វើពីធី ស្រង់ព្រះ ដើម្បីទទួលបានពរជ័យ សិរីសួស្ដីសម្រាប់​ឆ្នាំថ្មី ជាក់ស្តែងនៅក្នុងថ្ងៃនេះជាដើម៕ អត្ថបទ៖ សុន រ៉ាឌី