កំពង់ស្ពឺ ៖ សហគមន៍ទេសចរណ៍ធម្មជាតិខ្នងផ្សាររួមជាមួយនឹងក្រុមការងារមន្ទីរទេសចរណ៍ និងអាជ្ញាធរឃុំ​បានសម្រេចបិទផ្លូវ ម៉ូតូ ឡាន ឡើងខ្នងផ្សារជាផ្លូវការហើយ ដោយអនុញ្ញាតតែទេសចរណ៍ថ្មើរជើងតែប៉ុណ្ណោះ។ នេះបើយោងតាមការជូនដំណឹងនៅលើទំព័រហ្វេសប៊ុករបស់សហគមន៍ទេសចរណ៍ធម្មជាតិខ្នងផ្សារបង្ហោះនាថ្ងៃទី ១៦ ខែមេសា ឆ្នាំ២០២៣ ។

សហគមន៍ទេសចរណ៍ធម្មជាតិខ្នងផ្សារបានព្រមានចំពោះអ្នកដែលយក ម៉ូតូ ឡាន ឡើងខ្នងផ្សារ នឹង​ប្រឈម​មុខនឹង​ការអន្តរាគមន៍ពីក្រុមហ៊ុនបង្គោលភ្លើង អាជ្ញាធរភូមិឃុំ និងថ្នាក់ស្រុកដោយផ្ទាល់។ ការសម្រេចបិទផ្លូវម៉ូតូឡានជាផ្លូវការនេះ បន្ទាប់ពីមានមតិជាច្រើនរិះគន់ចំពោះការការជិះ ម៉ូតូ ឡាន ឡើងភ្នំ និងមានមតិមួយចំនួនទៀតបានរិះគន់ចំពោះតម្លៃម៉ូតូជិះឡើងភ្នំ។ 

សហគមន៍ទេសចរណ៍ធម្មជាតិខ្នងផ្សារបានលើកឡើងថា ករណីមួយមួយក្នុងសហគមន៍ដែលបាន​បង្កភាពស្មុគស្មាញ​នេះឡើង គឺការឈូសឆាយផ្លូវដាក់បង្គោលភ្លើងរបស់រដ្ឋ ហើយគម្រោងនេះបានឈូសលើផ្លូវ​ថ្មើរជើងរបស់​សហគមន៍​ដែលប្រើប្រាស់សម្រាប់នាំភ្ញៀវទេសចរ ដើរកំសាន្ត បោះតង់ តាមព្រៃភ្នំ បច្ចុប្បន្នគម្រោងនេះកំពុងដំណើរការ និង​មិនអាចបញ្ជាក់ការសាងសងរួចរាល់នៅពេលណានោះឡើយ។ ផ្លូវឈូសឆាយនេះដែរ មិនសម្រាប់ការជិះម៉ូតូ ឬឡាន​ឡើងនោះទេ ព្រោះជាទីតាំងសាងសងបង្គោលភ្លើង និងជាកន្លែងដែលមានគ្រោះថ្នាក់ខ្លាំង កន្លងមកមានភ្ញៀវទេសចរ​មួយចំនួនតូចនៅតែចង់យកម៉ូតូឡើងដោយខ្លួនឯង។ ក្រោយការឈូសឆាយផ្លូវចាស់១ឆ្នាំ សហគមន៍បានត្រួសត្រាយ​ផ្លូវដើរថ្មីមួយសម្រាប់បម្រើអោយការភ្ញៀវទេសចរដូចពីមុន ហើយបច្ចុប្បន្នផ្លូវនេះកំពុងតែទទួលភ្ញៀវធម្មតា។

ខ្នងផ្សារ គឺជាតំបន់ដ៏មានសក្ដានុពលខ្ពស់ផ្នែកទេសចរណ៍ធម្មជាតិ។ ខ្នងផ្សារ ស្ថិតក្នុងភូមិសាស្រ្តភូមិ តាំងបំពង់ ក្នុងតំបន់រលាក់កជើង នៃឃុំតាសាល ស្រុកភ្នំស្រួច ខេត្តកំពង់ស្ពឺ។ តំបន់ខ្នងផ្សារជាទីតាំងប្រសព្វមុំបីនៃភូមិសាស្រ្តខេត្តកោះកុង ខេត្តពោធិ៍សាត់ និងខេត្តកំពង់ស្ពឺ ដែលទីនេះ​ជាតំបន់មួយ​ដែលប្រជុំទៅដោយធនធានធម្មជាតិ ព្រៃឈើ សត្វព្រៃជាច្រើនប្រភេទរស់នៅ ជាពិសេសជ្រលងភ្នំខ្ពស់ ដែលអំណោយ​ផលខ្ពស់លើវិស័យអេកូទេសចរណ៍ធម្មជាតិ៕​ ដោយ ៖ សុជាតា