បាត់ដំបង៖ ប្រជាពលរដ្ឋរស់នៅក្នុងខេត្តបាត់ដំបងប្រមាណជាង ៥ពាន់នាក់ បានធ្វើដំណើរ​ទៅ​មកភ្នំពេញ-បាត់ដំបង តាមរយៈរថយន្តក្រុង ដែលសម្ដេចតេជោ ហ៊ុន សែន ប្រមុខរាជរដ្ឋាភិបាល​ផ្ដល់ជូនដោយមិនបង់ប្រាក់ ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ។

ក្នុងឱកាសអញ្ជើញជូនដំណើរប្រជាពលរដ្ឋឡើងរថយន្តក្រុងពីបាត់ដំបងទៅភ្នំពេញវិញ នាព្រឹកថ្ងៃទី១៧ ខែមេសា ឆ្នាំ២០២៣នេះ លោក ព្រួញ រិទ្ធិថា ប្រធានមន្ទីរសាធារណការ និង​ដឹកជញ្ជូន​ខេត្តបាត់ដំបង បានឱ្យដឹងថា សម្រាប់ខេត្តបាត់ដំបង ចាប់ពីថ្ងៃទី១៣​ដល់ថ្ងៃទី១៧​ខែមេសា ឆ្នាំ២០២៣ មានប្រជាពលរដ្ឋមិនក្រោម ៥ពាន់នាក់នោះទេ បានធ្វើដំណើរ​តាមរថយន្តក្រុង​ដែលរាជរដ្ឋាភិបាលផ្ដល់ឱ្យដោយមិនគិតថ្លៃ។

ជាមួយគ្នានេះលោកប្រធានមន្ទីរបានណែនាំដល់តៃកុង និងព្រូឡាន​ទាំងអស់ត្រូវគិតគូរខ្ពស់​ពី​សុវត្ថិភាពអ្នកដំណើរនិងមិនត្រូវប៉ះពាល់លុយកាក់របស់ប្រជាពលរដ្ឋជាដាច់ខាត។

ប្រជាពលរដ្ឋបានសម្ដែងអារម្មណ៍រំភើបរីករាយ និងថ្លែងអំណរគុណដល់សម្ដេចតេជោ​ ហ៊ុន សែន ដែល​បានផ្ដល់រថយន្តក្រុងឱ្យពួកគាត់បានជិះទៅមកដោយមិនបង់ប្រាក់។

ប្រជាពលរដ្ឋ បានអះអាងថា ការធ្វើដំណើរតាមរថយន្តក្រុងដែលរាជរដ្ឋាភិបាលផ្ដល់ឱ្យក្នុង​ឱកាស​ពិធីបុណ្យចូលឆ្នាំខ្មែរបានធ្វើឱ្យពួកគាត់កាត់បន្ថយការចំណាយថ្លៃធ្វើដំណើរ និង​ចំណេញ​ថវិកា​ច្រើនជាពិសេសការធ្វើដំណើរប្រកបដោយផាសុខភាពក្រោមការយកចិត្តទុកដាក់ពីតៃកុងឡានគ្រប់ពេលវេលា។

សូមបញ្ជាក់ថា សម្រាប់ខ្សែរត់តាមបណ្ដោយផ្លូវជាតិលេខ៥ ភ្នំពេញ-បាត់ដំបង និងបាត់ដំបង-ភ្នំពេញ​ប្រមុខរាជរដ្ឋាភិបាលកម្ពុជា ​សម្ដេចតេជោ ហ៊ុន សែន បានផ្ដល់រថយន្តក្រុងចំនួន៥០គ្រឿង​សម្រាប់ដឹកជញ្ជូនប្រជាពលរដ្ឋមកលេងស្រុកកំណើត និងត្រឡប់ទៅបំពេញការងារវិញ​ដោយឥតគិតថ្លៃ​ក្នុងឱកាសពិធីបុណ្យចូលឆ្នាំខ្មែរ៕