​ស្នូកឃ័រ​៖ ព្រឹត្តិការណ៍​ស្នូកឃ័រ​ជើងឯក​ពិភពលោក​ បានបញ្ចប់​ហើយ​នៅ​យប់​ថ្ងៃ​ចន្ទ​ម្សិលមិញ​នេះ កីឡាករ​អង់គ្លេស Mark Selby បាន​យកឈ្នះ Shaun Murphy ដើម្បី​គ្រង​ជើងឯក​ពិភព​លោក​លើក​ទី៤ ក្នុង​អាជីព​។

ការប្រកួត​វគ្គ​ផ្តាច់ព្រ័ត្រ​នៅ​កីឡដ្ឋាន Crucible ទីក្រុង Sheffield ចក្រភព​អង់គ្លេស​ ត្រូវបាន​អនុញ្ញាត​អោយ​អ្នកគាំទ្រចូល​ទស្សនា​ពេញ​កីឡដ្ឋាន​តែម្តង ​ជា​លើកដំបូង​តាំងពី​ការផ្ទុះ​ឡើង​នៃ​មេរោគ Covid-19​។ ​Mark Selby ដែល​ចាប់ផ្តើម​ដំណាក់​ចុងក្រោយ​ដោយ​នាំមុខ​ទៅលើ Murphy ១៤-១១ហ្វ្រេ​ម បាន​យកឈ្នះ ៣ហ្វ្រេ​ម​ចុងក្រោយ​ដោយ​មួយ​ការ​វាយ​មួយ​ឈើ ៦៦ពិន្ទុ, ៦៨ពិន្ទុ និង ១២០ពិន្ទុ​ដើម្បី​យកឈ្នះ​ការប្រកួត​លើ​ជើងឯក​ពិភពលោក​ឆ្នាំ២០០៥ Shaun Murphy ១៨-១៥ហ្វ្រេ​ម​។ ​​កីឡាករ​វ័យ ៣៧ឆ្នាំ Mark Selby ក្នុងនាម​ជើងឯក​ទទួលបាន​ប្រាក់រង្វាន់ ៥០ម៉ឺន​ផោន ហើយ​បាន​រំកិល​ឡើងមកឈរ​លេខ២ ពិភពលោក​ពីក្រោយ​កីឡា​ករលេខ១ Judd Trump​។​

មុន​ឈ្នះ​ជើងឯក​នេះ Mark Selby បាន​យកឈ្នះ Kurt Maflin ​ជុំ​ទី១ យកឈ្នះ Mark Allen ជុំ​ទី២ យកឈ្នះ Williams វគ្គ ៨នាក់​ចុងក្រោយ និង​យកឈ្នះ Stuart Bingham វគ្គ​ពាក់កណ្តាល​ផ្តាច់ព្រ័ត្រ​។​ ​គិត​មកដល់ពេលនេះ Mark Selby គ្រង​ជើងឯក​ពិភពលោក​បាន ៤ដង​ស្មើនឹង Joh Higgins តាម​ពីក្រោយ Ronnie O’Sullivan, Ray Reardon និង Steve Davis ដែល​ឈ្នះ ៦លើក​ដូចគ្នា ខណៈ Stephen Hendry នៅតែ​ឈរលើ​គេ​ឈ្នះ​ជើងឯក​សរុប ៧ដង​៕

​អត្ថបទ​៖​នាង សុភា​វុ​ធ