កំពង់ធំ៖ រយៈពេល៣ថ្ងៃ នៃពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំថោះ បញ្ចស័ក ពស.២៥៦៧ គស.២០២៣ គិតចាប់ពីថ្ងៃទី១៤-១៥-១៦ ខែមេសា ឆ្នាំ២០២៣ ខេត្តកំពង់ធំទទួលបានភ្ញៀវទេសចរ ប្រមាណជាង២០ ម៉ឺននាក់។

តាមរបាយការណ៍របស់មន្ទីរទេសចរណ៍កំពង់ធំ នៅថ្ងៃទី១៧ ខែមេសា ឆ្នាំ២០២៣ មានប្រជាពលរដ្ឋ និងភ្ញៀវទេសចរបានមកទស្សនានៅតាមរមណីយដ្ឋាន​ គោលដៅទេសចរណ៍ និងប្រជាពលរដ្ឋ​ចូលរួម​នៅតាមបណ្តាវត្តអារ៉ាមនានា ក្នុងខេត្តកំពង់ធំ មានសរុបចំនួន ២០៨,១៥៤នាក់ ក្នុងនោះទេសចរជាតិចំនួន ២០៨,០០០នាក់ និងទេសចរអន្តរជាតិចំនួន ១៥៤នាក់។

ទន្ទឹមជាមួយគ្នានេះដោយមានការយកចិត្តទុកដាក់របស់ប្រមុខរាជរដ្ឋាភិបាលក៏ដូចជា ឯកឧត្តម ងួន រតនៈ អភិបាលខេត្តកំពង់ធំ និងក្រុមការងារ បានបង្កើតព្រឹត្តិការណ៍សង្ក្រាន្តកំពង់ធំ មានបងប្អូន​ប្រជាពលរដ្ឋ​មកលេងកំសាន្តដែលមានទីតាំងនៅ សួនស្ទឹងសែន និងតាមបណ្តាវគ្រប់ត្តអារ៉ាម ក្នុងខេត្តបង្ករភាពសប្បាយរីករាយជូនប្រជាពលរដ្ឋ គ្រប់ទីកន្លែង​ គ្រប់មជ្ឈដា្ឋន នៅតាម​បណ្តា​រមណីយដ្ឋាន។ ដំណើរការទទួលភ្ញៀវទេសចរណ៍ បានសហការជាមួយកម្លាំង​សមត្ថកិច្ចមូលដ្ឋាន​រៀបចំសណ្តាប់ធ្នាប់ រក្សាសន្តិសុខ នៅក្នុងរមណីយដ្ឋានបានល្អ។

ក្នុងនោះផងដែរ​សង្ក្រាន្ត​បានបង្កើតកម្មវិធីលេងល្បែងប្រជាប្រិយដែលមាន​ ចោលឈូង ទាញព្រ័ត្រ​ លាក់កន្សែង ស្វាដណ្ដើមស្លឹកឈើ ឡើងសសរខ្លាញ់ តំបន់ត្រជាក់ ប្រដាល់បិទមុខ និងល្បែងផ្សេងៗទៀតជាច្រើន។

ក្នុងនាមរដ្ឋបាលខេត្ត ដ៏ដូចជាប្រជាពលរដ្ឋ ខេត្តកំពង់ធំ, ឯកឧត្តម ងួន រតនៈ អភិបាលខេត្ត សូមថ្លែង​អំណរគុណយ៉ាងជ្រាលជ្រៅបំផុតចំពោះក្រុមការងារ​ កងកម្លាំងសមត្ថកិច្ច និង​អ្នកពាក់​ព័ន្ធទាំងអស់ ដែលបានយកចិត្តទុកដាក់បង្កើតកម្មវិធីព្រឹត្តិការណ៍សង្ក្រាន្ត កំពង់ធំ​ទទួលបាន​ជោគជ័យ​ជាពិសេសការការពារសន្តិសុខសណ្ដាប់ធ្នាប់ជូនបងប្អូនប្រជាពលរដ្ឋមកកំសាន្ត ទស្សនា លេង​ល្បែងប្រជាប្រិយ ​ប្រកបដោយភាពសប្បាយរីករាយក្រោមម្លប់សន្តិភាព៕