ភ្នំពេញ៖ ប្រជាពលរដ្ឋ ក្មេង ចាស់ បានធ្វើដំណើរចេញពីស្រុកកំណើត ចូលមកកាន់​រាជធានីភ្នំពេញ ក្រោយលេងកម្សាន្តបុណ្យចូលឆ្នាំថ្មី​ ឆ្នាំថោះ ២០២៣ ត្រូវបានបញ្ចប់ទាំងកី្ត​សប្បាយរីករាយ។

ជាក់ស្តែងនាព្រឹកថ្ងៃទី១៧ ខែមេសា ឆ្នាំ២០២៣នេះ ក្រោយបញ្ចប់នៃពិធីបុណ្យចូលឆ្នាំថ្មី ប្រពៃណីជាតិ រយៈពេល០៣ថ្ងៃ ក្រោមម្លប់សន្តិភាពនេះ ប្រជាពលរដ្ឋ ​បានធ្វើដំណើរ​ចាក់ចេញ​ពីស្រុកកំណើតរៀងៗខ្លួន ដើម្បីមកកាន់រាជធានីភ្នំពេញ ក្នុងនោះមានប្រជាពលរដ្ឋមកពីខេត្តព្រៃវែង ខេត្តស្វាយរៀង និងមកពីបណ្តាខេត្តផ្សេងទៀត ធ្វើដំណើរតាមបណ្តោយផ្លូវជាតិលេខ០១ បានប្រាប់BTV ព័ត៌មានថា ក្នុងពិធីបុណ្យចូលឆ្នាំថ្មី រយៈពេល០៣ថ្ងៃចាប់ពីថ្ងៃទី១៤-១៥-១៦ ខែមេសា ឆ្នាំ២០២៣ ​ពិតជាសប្បាយរីករាយ ​ពួកគាត់បានជួបជុំគ្រួសារ ពុក ម៉ែ បងប្អូន និងទៅលេខ​កម្សាន្តតាមរមណីយដ្ឋាននានា​ ដែលអាជ្ញាធរខេត្តបានរៀបចំមហា​សង្ក្រាន្ត​តាមទីវត្តអារាម និងទីតាំងផ្សេងៗ។

ជាមួយគ្នានោះដែរ លោកអនុសេនីយ៍ឯក អ៊ិន ណន មន្រី្តនគរបាលចរាចរណ៍ផ្លូវគោក​រាជធានី​ភ្នំពេញ ឈរជើងប្រចាំការ និងសម្រួលចរាចរណ៍​ នៅគោលដៅភ្លើងស្តុប ច្រកថៃហ្គ័រ បានឲ្យដឹងដែរថា ​ក្រោយពីបុណ្យចូលឆ្នាំថ្មី រួចរាល់ហើយ កម្លាំង​នគរបាលចរាចរណ៍​ផ្លូវគោក​រាជធានីភ្នំពេញ ​នៅឈរជើងចាំជួយសម្រួលចរាចរណ៍ជូនបងប្អូន​ប្រជាពលរដ្ឋ ចាប់ពីម៉ោង៧ព្រឹក​កុំឲ្យមានការកកស្ទះចរាចរណ៍ ទាំងទៅ ទាំងមក​ ជាពិសេសបងប្អូនប្រជាពលរដ្ឋ ដែលវិលមកកាន់រាជធានីភ្នំពេញ។

ជាចុងក្រោយលោកអនុសេនីយ៍ឯក បាន​អំពាវនាវជូនដល់ប្រជាពលរដ្ឋទូទាំងប្រទេស ដែល​ធ្វើដំណើរតាមដងផ្លូវ ត្រូវចូលរួមគោរពច្បាប់ចរាចរណ៍​ឲ្យមានសុវតិ្ថភាព និងកុំឲ្យកើត​មាន​គ្រោះថ្នាក់​ចរាចរណ៍​ ជាពិសេសក្នុងនាមជាមន្រ្តីចរាចរណ៍ ​ទោះបីជាឈរហាលក្តៅ ហាលភ្លៀង ក៏មិនមែនជាឧបសគ្គសម្រាប់ពួកគាត់ដែរ ធ្វើយ៉ាងណាជួយ​សម្រួលចរាចរណ៍ជូន​បងប្អូន​ប្រជាពលរដ្ឋ កុំឲ្យមានការកកស្ទះ​ និង​បញ្ចៀស​នូវគ្រោះថ្នាក់លើដងផ្លូវផងដែរ៕អត្ថបទ រដ្ឋា