បន្ទាប់ពីការប្រយុទ្ធគ្នាដ៏តានតឹងមួយថ្ងៃ កងទ័ពរបស់ប្រទេសស៊ូដង់ទំនងរុលចូលទៅមុខ កាលពី​ថ្ងៃអាទិត្យទី១៦ ខែមេសា ប្រឆាំងការតស៊ូដណ្តើមអំណាចគ្នាជាមួយកងកម្លាំង​ទាហានប៉ារ៉ា​ជាគូប្រជែង ដោយបានបំផ្ទុះមូលដ្ឋានរបស់ពួកគេក្នុងការវាយប្រហារតាមអាកាស។

យោងតាមសហជីពគ្រូពេទ្យ បានឲ្យដឹងថា ជនស៊ីវិលជិត ១០០នាក់បានស្លាប់ និងអ្នករងរបួស ១១០០នាក់ នៅក្នុងការប៉ះទង្គិចគ្នា ក្នុងនោះមានបុគ្គលិកអង្គការសហប្រជាជាតិ៣នាក់ផងដែរ។ អគ្គិភ័យ និងផ្សែងខ្មៅអាចត្រូវបានគេមើលឃើញពាសពេញផ្ទៃអាកាសនៅទីក្រុង Khartoum ។ រូបភាពពីផ្កាយរណប បានបង្ហាញយន្តហោះកំពុងឆេះនៅអាកាសយានដ្ឋានអន្តរជាតិ ទីក្រុង Khartoum ព្រមទាំងអគ្គិភ័យនៅក្បែរមន្ទីរពេទ្យមួយកន្លែង។

ភាគីទាំងពីរបានព្រមព្រៀងលើការផ្អាកមនុស្សធម៌រយៈពេលបីម៉ោង ​ជាកិច្ចព្រមព្រៀងដែល​ស្នើឡើង​ដោយអង្គការសហប្រជាជាតិ។​ ខណៈការបាញ់ប្រហារបានធូរស្រាល សាក្សីរបស់​សារព័ត៌មាន រ៉យទ័រម្នាក់បាននិយាយថា ការទម្លាក់គ្រាប់បែកយ៉ាងខ្លាំងបានកើតឡើងភ្លាមៗ​ក្រោយមក។ អតីតនាយករដ្ឋមន្ត្រីស៊ូដង់ លោក Abdalla Hamdok បានអំពាវនាវឱ្យមានបទ​ឈប់បាញ់​បន្ទាន់ ដែលអនុញ្ញាតឱ្យមានច្រករបៀងមនុស្សធម៌។

សហជីពក្រុមគ្រូពេទ្យ បាន​និយាយថា វាពិបាកសម្រាប់គ្រូពេទ្យ និងអ្នកជំងឺក្នុងការទៅដល់និងមកពីមន្ទីរពេទ្យ។ អំពើហឹង្សាដែលបានចាប់ផ្តើមកាលពីថ្ងៃសៅរ៍ ត្រូវបានបង្កឡើងដោយភាពមិនចុះសម្រុងគ្នាជុំវិញ​ការធ្វើ​សមាហរណ៍កម្មកងកម្លាំងគាំទ្ររហ័ស(RSF) ទៅក្នុងយោធាដែលជាផ្នែក​នៃការ​សម័យ​អន្តរកាល​ទៅកាន់ការគ្រប់គ្រងបែបស៊ីវិល។ វាគឺជាការផ្ទុះឡើងលើកដំបូងចាប់តាំងពីឆ្នាំ ២០១៩មក នៅពេលដែលក្រុមទាំងពីរបានរួមកម្លាំងដើម្បីបណ្តេញអ្នកកាន់អំណាចផ្តាច់ការអ៊ីស្លាមនិយមជើងចាស់ លោក Omar al-Bashir។

សហរដ្ឋអាមេរិក ចិន រុស្ស៊ី អេហ្ស៊ីប អារ៉ាប៊ីសាអូឌីត ក្រុមប្រឹក្សាសន្តិសុខអង្គការសហប្រជាជាតិ សហភាពអឺរ៉ុប និងសហភាពអាហ្វ្រិក ​បានអំពាវនាវឱ្យបញ្ចប់អរិភាពឲ្យបានឆាប់រហ័ស។ ពួកគេនិយាយថា ការប្រយុទ្ធគ្នា​ គំរាមកំហែង​ដល់អស្ថិរភាពកាន់តែធ្ងន់ធ្ងរនៅក្នុងតំបន់ដែល​មានការប្រែប្រួលខ្លាំងជាងមុន៕