ប្រទេសប៉ូឡូញ និងហុងគ្រី បានហាមឃាត់ការនាំចូលគ្រាប់ធញ្ញជាតិ និងស្បៀងអាហារផ្សេងទៀត​ពីប្រទេសអ៊ុយក្រែន ដើម្បីការពារកសិកររបស់ពួកគេ។

អ្នកនាំពាក្យគណៈកម្មាធិការអឺរ៉ុប កាលពីថ្ងៃអាទិត្យ ទី១៦ ខែមេសា បានថ្កោលទោស​ចំពោះ​សកម្មភាព​ជាឯកតោភាគីថា ​មិនអាចទទួលយកបាន លើការធ្វើពាណិជ្ជកម្មដោយប្រទេសជា​សមាជិកទាំងពីរនេះ។ ការវាយលុករបស់រុស្ស៊ីលើអ៊ុយក្រែន កាលពីឆ្នាំមុន បានបិទកំពង់ផែ​សមុទ្រ​ខ្មៅមួយចំនួន ដោយបន្សល់ទុកនូវបរិមាណដ៏ច្រើននៃគ្រាប់ធញ្ញជាតិរបស់អ៊ុយក្រែន ដែលមាន​តម្លៃថោកជាងផលិតផលដែលផលិតនៅក្នុងសហភាពអឺរ៉ុប នៅក្នុងរដ្ឋអឺរ៉ុបកណ្តាលដោយសារ​តែការកកស្ទះផ្នែកដឹកជញ្ជូន។

បញ្ហានេះបានធ្វើឲ្យតម្លៃធ្លាក់ចុះ និងប៉ះពាល់ដល់ការលក់សម្រាប់កសិករក្នុងស្រុក ដោយធ្វើឱ្យមាន​ការផ្ទុះកំហឹងចំពោះគណបក្សយុត្តិធម៌ និងច្បាប់ជាតិនិយមកំពុងកាន់អំណាចរបស់ប្រទេសប៉ូឡូញ ដែលមានមូលដ្ឋានគាំទ្រដល់តំបន់ជនបទ នៅក្នុងឆ្នាំបោះឆ្នោត។

រដ្ឋមន្ត្រីក្រសួងអភិវឌ្ឍន៍ និងបច្ចេកវិទ្យា ​បាននិយាយកាលពីថ្ងៃអាទិត្យថា ការដាក់បម្រាម​របស់​ប្រទេសប៉ូឡូញ ដែលបានចូលជាធរមានកាលពីល្ងាចថ្ងៃសៅរ៍ ​ទី១៥ ខែ មេសា ក៏នឹង​អនុវត្តចំពោះការ​ដឹកជញ្ជូនផលិតផលទាំងនេះឆ្លងកាត់ប្រទេសផងដែរ។

រដ្ឋាភិបាលរបស់នាយករដ្ឋមន្ត្រីហុងគ្រី លោក Viktor Orban បានអនុវត្តតាម ប៉ុន្តែមិនបានប្រាប់ថា​ការដាក់បម្រាមរបស់ខ្លួននឹងចូលជាធរមាននៅពេលណានោះទេ។

ទីក្រុង Kyiv និយាយថា ការហាមប្រាមរបស់ប្រទេសប៉ូឡូញផ្ទុយ នឹងកិច្ចព្រមព្រៀងទ្វេភាគី ហើយ​បានអំពាវនាវឱ្យមានការពិភាក្សាដើម្បីដោះស្រាយបញ្ហា។ ប្រទេសអ៊ុយក្រែន នាំចេញ​ទំនិញ​កសិផលភាគច្រើនរបស់ខ្លួន​ ជាពិសេសគ្រាប់ធញ្ញជាតិ ​តាមរយៈកំពង់ផែ​សមុទ្រខ្មៅរបស់ខ្លួន ដែលមិនត្រូវបានរារាំង​កាលពីខែកក្កដា​ ក្រោមកិច្ចព្រមព្រៀងរវាងប្រទេសអ៊ុយក្រែន​ ទួរគី​ រុស្ស៊ី និងអង្គការសហប្រជាជាតិ។