ប្រព័ន្ធផ្សព្វផ្សាយរដ្ឋ KCNA បានរាយការណ៍ថា ប្រទេសកូរ៉េខាងជើង​បានរៀបចំពិធីមួយ កាលពីថ្ងៃអាទិត្យ ទី១៦ ខែមេសា ដើម្បីអបអរការបញ្ចប់ការសាងសង់លំនៅឋានទំនើបថ្មីចំនួន ១០.០០០ ខ្នងនៅក្នុងសង្កាត់ Hwasong ដែលទើបសាងសង់ថ្មីក្នុងទីក្រុងព្យុងយ៉ាង។

របាយការណ៍ បាននិយាយថា មេដឹកនាំ លោក គីម ជុងអ៊ុន បានចូលរួមក្នុងពិធីនេះ ព្រមទាំង​មន្ត្រី​រដ្ឋាភិបាលជាន់ខ្ពស់មួយចំនួន រួមទាំងលោក Kim Tok Hun រដ្ឋមន្ត្រីនៃគណៈរដ្ឋមន្ត្រី។ ព្រឹត្តិការណ៍ដ៏សំខាន់នេះធ្វើឡើងរយៈពេលពីរខែបន្ទាប់ពីលោក Kim បានចាប់ផ្តើមពិធីបញ្ចុះបឋម​សិលា​កាលពីខែកុម្ភៈលើគម្រោងលំនៅឋានមួយផ្សេងទៀតដែលត្រូវបានចាត់ទុកថា​ជាវិថី​ដ៏ល្អអស្ចារ្យមួយផ្សេងទៀតនៃប្រទេសសង្គមនិយមដែលពោរពេញទៅដោយសុភមង្គលរបស់ប្រជាជន។

កាលពីឆ្នាំ ២០២១ ប្រទេសកូរ៉េខាងជើង បានប្រកាសផែនការសាងសង់ផ្ទះល្វែងថ្មីចំនួន ៥០,០០០ខ្នង ​នៅក្នុងរដ្ឋធានីក្នុងរយៈពេលប្រាំឆ្នាំ។ ចាប់តាំងពីពេលនោះមក ប្រទេសកូរ៉េខាងជើង បាននិយាយថា​ ខ្លួនបានឆ្ពោះទៅមុខជាមួយ​នឹងគម្រោងសាងសង់ជាបន្តបន្ទាប់ ដែលគម្រោងមួយ​ចំនួន​នៅតែដំណើរការ ក្នុងពេលមានការសង្ស័យពីបរទេសអំពីកង្វះស្បៀងអាហារ។ យោងតាមសារព័ត៌មាន KCNA បានឲ្យដឹងថាលោក Kim បាននិយាយថា ផែនការសាងសង់​លំនៅឋាន គឺជាគម្រោងដែលរង់ចាំជាយូរមកហើយដោយគណបក្ស និងប្រទេសរបស់លោក ហើយលោកបានអះអាងជាថ្មីអំពីគំនិតរបស់លោកក្នុងការធ្វើឱ្យទីក្រុងព្យុងយ៉ាងក្លាយជាទីក្រុងអន្តរជាតិ។