មន្ត្រីក្រសួងការបរទេស និងការពារជាតិជប៉ុន និងកូរ៉េខាងត្បូង បានមកដល់ទីក្រុងសេអ៊ូល ដើម្បី​ចាប់ផ្តើមកិច្ចពិភាក្សាផ្នែកសន្តិសុខនៅថ្ងៃចន្ទ ទី១៧ ខែមេសានេះ ជាជំនួបលើកដំបូងរវាង​ប្រទេសទាំងពីក្នុងរយៈពេលប្រាំឆ្នាំមកនេះ។

ក្រសួងការបរទេសទីក្រុងសេអ៊ូល ​បាននិយាយនៅក្នុងសេចក្តីថ្លែងការណ៍ថា នៅ​ក្នុង​កិច្ច​ពិភាក្សានេះ គណៈប្រតិភូត្រូវបានគេរំពឹងថានឹងពិភាក្សាអំពីស្ថានភាពសន្តិសុខ​នៅអាស៊ីឦសាន និង​នៅឧបទ្វីបកូរ៉េ កិច្ចសហប្រតិបត្តិការទ្វេភាគីលើសន្តិសុខការពារជាតិ និងផលប្រយោជន៍​ទៅវិញទៅមក។

យោងតាមកងទ័ពជើងទឹកកូរ៉េខាងត្បូង បានឲ្យតដឹងថា ក្រៅពីកិច្ចពិភាក្សានេះ ប្រទេសទាំងពីរ​ក៏បានចូលរួមជាមួយសហរដ្ឋអាមេរិក ក្នុងសមយុទ្ធការពារមីស៊ីលរួមគ្នានៅក្នុងដែនទឹកអន្តរជាតិ​នៅ​សមុទ្រខាងកើតនៅថ្ងៃចន្ទនេះ ​ក្នុងពេលមានការគំរាមកំហែងនុយក្លេអ៊ែរ និងមីស៊ីលរបស់​ប្រទេសកូរ៉េខាងជើង ។

ទំនាក់ទំនងរវាងសម្ព័ន្ធមិត្តអាស៊ីខាងជើងទាំងពីររបស់អាមេរិក មានភាពតានតឹងជុំវិញជម្លោះដែល​មាន​មកតាំងពីការកាន់កាប់កូរ៉េឆ្នាំ ១៩១០-១៩៤៥ របស់ជប៉ុន ​ដោយទីក្រុងវ៉ាស៊ីនតោន បាន​ដាក់គំនាបទីក្រុងតូក្យូ ​និងសេអ៊ូល ដើម្បីជួសជុលរបង ការពារស្របពេលការប្រឈមនឹងការ​គំរាមកំហែង​នុយក្លេអ៊ែររបស់កូរ៉េខាងជើង ​និងការកើនឡើងឥទ្ធិពលរបស់ប្រទេសចិន។