ប្រធានាធិបតីរុស្ស៊ី លោក វ្ល៉ាឌីមៀ ពូទីន និងរដ្ឋមន្ត្រីការពារជាតិចិន លោក Li Shangfu បានជួបពិភាក្សា កាលពីថ្ងៃអាទិត្យនៅទីក្រុងមូស្គូ ជាទីដែលភាគីទាំងពីរ បានសាទរ​ចំពោះកិច្ច​សហប្រតិបត្តិការយោធាដ៏ជិតស្និទ្ធរបស់ប្រទេសទាំងពីរ។

ជំនួបនេះ បានចាប់ផ្ដើមក្នុងដំណើរទស្សនកិច្ចរយៈពេលបួនថ្ងៃរបស់លោក Li ទៅកាន់ប្រទេសរុស្ស៊ី ជាដំណើរទស្សនកិច្ចទៅក្រៅប្រទេសលើកដំបូងរបស់លោក ចាប់តាំងពីបានចូលកាន់តួនាទី​កាល​ពីខែមុន។ជំនួបនេះបានកើតឡើង ខណៈបណ្តាប្រទេសលោកខាងលិច បានបង្កើនសម្ពាធ​លើទីក្រុងប៉េកាំង ​ដើម្បីជំរុញលោកពូទីន ឱ្យបញ្ចប់សង្រ្គាមរបស់លោកមកលើអ៊ុយក្រែន។

លោក Li ជាឧត្តមសេនីយ៍ និងទាហានជើងចាស់នៃយុទ្ធនាការជំរុញទំនើបកម្ម​យោធា​របស់ប្រទេសចិន ត្រូវបានដាក់ទណ្ឌកម្មដោយសហរដ្ឋអាមេរិក ក្នុងឆ្នាំ ២០១៨ ជុំវិញប្រតិបត្តិការ​ជាមួយ​ក្រុមហ៊ុននាំចេញអាវុធដែលគ្រប់គ្រងដោយរដ្ឋរបស់រុស្ស៊ី Rosoboronexport នៅពេលដែល​លោកដឹកនាំក្រសួងអភិវឌ្ឍន៍គ្រឿងយោទ្ធោបករណ៍របស់យោធាចិន។

យោងតាមក្រសួងការបរទេសសហរដ្ឋអាមេរិក បានឲ្យដឹងថា ប្រតិបត្តិការទាំងនេះ រួមមានការ​ដឹកជញ្ជូនយន្តហោះចម្បាំង Su-35 របស់រុស្ស៊ីទៅឱ្យប្រទេសចិនក្នុងឆ្នាំ ២០១៧ និងឧបករណ៍​ទាក់ទងនឹងប្រព័ន្ធមីស៊ីលបាញ់ពីដីទៅអាកាស S-400 ក្នុងឆ្នាំ ២០១៨ ។ ដំណើរទស្សនកិច្ចរបស់លោក Li ធ្វើឡើងបន្ទាប់ពីដំណើរទស្សនកិច្ចផ្លូវរដ្ឋរបស់មេដឹកនាំចិន លោក Xi Jinping ទៅកាន់ប្រទេសរុស្ស៊ី កាលពីខែមុន ដែលក្នុងនោះលោក Xi និងលោក Putin បានពង្រឹង​ទំនាក់ទំនង​របស់ប្រទេសទាំងពីរបន្ថែមទៀត ហើយបានប្តេជ្ញាពង្រឹងទំនុកចិត្តគ្នាទៅវិញទៅមកផ្នែក​យោធា ​និងពង្រឹងការផ្លាស់ប្តូរ ​និងកិច្ចសហប្រតិបត្តិការយោធា។

យោងតាមសេចក្តីថ្លែងការណ៍របស់វិមានក្រឹមឡាំង បានឲ្យដឹងថា​ ក្នុងអំឡុងពេលជំនួបជាមួយ​លោក Li កាលពីថ្ងៃអាទិត្យ ​លោកពូទីន បានចាត់ទុកដំណើរទស្សនកិច្ចនាពេលថ្មីៗ​នេះរបស់លោក Xi មកកាន់ប្រទេសរុស្ស៊ីថា ទទួលបានផ្លែផ្កា​ និងបាននិយាយថា ​ទំនាក់ទំនងរវាងរុស្ស៊ី និងចិន​កំពុងរីកលូតលាស់យ៉ាងល្អលើគ្រប់វិស័យ​ រួមទាំងផ្នែកយោធាផងដែរ ៕