ភ្នំពេញ៖ របាយការណ៍បឋមពីរដ្ឋាករស្វយ័តដឹកជញ្ជូនសាធារណៈ រថយន្តក្រុងរាជធានីភ្នំពេញ បានឲ្យដឹងថា គិតត្រឹមព្រឹកថ្ងៃទី១៧ ​ខែមេសានេះ មានពលរដ្ឋប្រមាណជាង ៤០ ០០០នាក់ បានទទួលសេវាការធ្វើដំណើរ​ តាមរថយន្តក្រុង​របស់ សាលារាជធានីភ្នំពេញដោយឥតគិតថ្លៃ ដើម្បីដើរកម្សាន្ត ​និងទៅលេងស្រុកកំណើតតាមបណ្តាខេត្ត នៅក្នុងអំឡុងថ្ងៃបុណ្យ​ចូលឆ្នាំថ្មីប្រពៃណី​ខ្មែរនេះ។

ពលរដ្ឋមកពីខេត្តកំពង់ឆ្នាំង កំពង់ចាម និងខេត្តត្បូងឃ្មុំ ថ្លែងប្រាប់BTV នៅថ្ងៃទី១៧ ខែមេសានេះ ថា នៅក្នុងឱកាសបុណ្យចូលឆ្នាំប្រពៃណីខ្មែរឆ្នាំនេះ ​ពួកគាត់បានសូមថ្លែងអំណរគុណសម្តេចតេជោ ហ៊ុន សែន នាយករដ្ឋមន្ត្រីកម្ពុជា ដែលបានផ្តល់រថយន្តក្រុង​ធ្វើដំណើរទាំងទៅទាំង​មកដោយ​ឥតគិតថ្លៃ ដែលបានជួយកាត់បន្ថយការចំណាយរបស់ពលរដ្ឋម្នាក់ៗបានប្រមាណពី៣០០០០រៀល ទៅ៨០០០០រៀល។

តាមរយៈរថយន្តក្រុងនេះ ក៏បានរួមចំណែកទប់ស្កាត់រថយន្ត​ឈ្នួល​ឯកជន ដែលតែងតែយក​ឱកាសនេះ​ដំឡើងថ្លៃខ្ពស់ហួសហេតុពីការធ្វើដំណើរនេះផងដែរ។

រដ្ឋាករស្វយ័តដឹកជញ្ជូនសាធារណៈ រថយន្តក្រុងរាជធានីភ្នំពេញ ​បានឲ្យដឹងថា ឱកាសបុណ្យចូល​ឆ្នាំថ្មី ឆ្នាំនេះ រដ្ឋបាលសាលារាជធានីភ្នំពេញ ​បានប្រើប្រាស់រថយន្តក្រុងCity Bus ចំនួន៣៤៥គ្រឿង ក្នុងនោះក្នុងរាជធានីភ្នំពេញ៧០គ្រឿង ​និងដឹកអ្នកដំណើរទៅមកតាមបណ្តាខេត្តចំនួន ២៧៥គ្រឿង។

ការដឹកក្នុងរយៈពេល៥ថ្ងៃចាប់ពីថ្ងៃទី១៣ ដល់ថ្ងៃទី១៧ ខែមេសានេះ គឺមានអ្នកដំណើរទៅទទួល​សេវា​ជិះពេញៗ ហើយគ្រប់អ្នកធ្វើដំណើរមានទឹកមុខសប្បាយរីករាយ ​ជាមួយនឹងខិតខំផ្តល់សេវាល្អ ការធ្វើបដិសណ្ឋារកិច្ចល្អពីតៃកុងឡាន​ និងមន្ត្រីបំរើការក្នុងរថយន្តក្រុង៕អត្ថបទ ស៊ុម សុខជា