ភ្នំពេញ៖ បញ្ជាការកងទ័ពជើងគោក នៃកងយោធពលខេមរភូមិន្ទ និងបញ្ជាការដ្ឋានកងទ័ពការពារព្រំដែន នៃ​ក្រសួងការពារប្រទេសវៀតណាម នៅឆ្នាំ២០២៣នេះ នឹងធ្វើលំហាត់រួមគ្នាមួយ ពាក់ព័ន្ធនឹងការងារ​សង្គ្រោះគ្រោះ​មហន្តរាយ និងការប្រឆាំងបទល្មើសនៅតាមបណ្ដោយព្រំដែន នៃប្រទេសទាំងពីរ ។

ក្នុងខ្លឹមសារនៃកិច្ចប្រជុំបូកសរុបលទ្ធផលកិច្ចសហប្រតិបត្តិការឆ្នាំ២០២២ និងលើកទិសដៅបន្តឆ្នាំ២០២៣ រវាង​នាយឧត្តមសេនីយ៍ ហ៊ុន ម៉ាណែត អគ្គមេបញ្ជាការរង នៃកងយោធពលខេមរភូមិន្ទ មេបញ្ជាការកងទ័ពជើងគោក និងឧត្តមសេនីយ៍ទោ ឡេ ឌឹកថាយ មេបញ្ជាការបញ្ជាការដ្ឋានកងទ័ពការពារព្រំដែន ក្រសួងការពារវៀតណាម នៅថ្ងៃទី១៧ ខែមេសា ដោយភាគីទាំងពីរ នៅឆ្នាំ២០២៣នេះ បានឯកភាពលើការបន្តកិច្ចខិតខំប្រឹងប្រែង សហការអនុវត្តភារកិច្ចស្របតាមខ្លឹមសារ នៃសេចក្តីថ្លែងការណ៍រួមនៅឆ្នាំ២០១៩, ពិធីសារស្តីពី កិច្ចសហប្រតិបត្តិការ​ការពារជាតិទ្វេភាគី ដំណាក់កាល២០២០-២០២៤ និងផែនការកិច្ចសហប្រតិបត្តិការ ប្រចាំឆ្នាំ២០២៣ រវាង​ក្រសួងការពារជាតិ នៃប្រទេសទាំងពីរ ជាពិសេសការជំរុញ MOU ស្តីពីកិច្ចសហប្រតិបត្តិការការពារព្រំដែនគោក ឱ្យកាន់តែមានប្រសិទ្ធភាព និងប្រសិទ្ធផលខ្ពស់ ។

កិច្ចសហប្រតិបត្តិការនេះ សំដៅនាំមកការរីកចម្រើនកាន់តែសកម្ម រវាងកងទ័ពការពារព្រំដែននៃប្រទេសទាំងពីរ ដើម្បីធានាបាននូវព្រំដែនសន្តិភាព ការអភិវឌ្ឍរួម ផ្តោតលើអាទិភាពមួយចំនួន ដូចជាបន្តកិច្ចសហការ​ជួយគ្នា​ទៅវិញទៅមក ដើម្បីរួមគ្នាទប់ស្កាត់ការរីករាលដាលជំងឺកូវីដ-១៩, ការចូលរួមបង្ក​លក្ខណៈដល់​ភារកិច្ចខណ្ឌ​សីមា និងការបោះបង្គោលព្រំដែនឱ្យបានឆាប់ចប់ជាស្ថាពរ, ជំរុញកិច្ចសហប្រតិបត្តិការ ក្នុងការ​ប្រយុទ្ធ​ប្រឆាំងបទល្មើស​ឆ្លងដែនគ្រប់ប្រភេទ, គាំទ្រលើការហ្វឹកហ្វឺនបណ្តុះបណ្តាលធនធានមនុស្ស, បន្តសកម្មភាពផ្លាស់ប្តូរ​គណៈប្រតិភូគ្រប់​កម្រិត និងការត្រៀមលក្ខណៈចូលរួមអនុវត្តលំហាត់រួម លើប្រធានបទសង្គ្រោះគ្រោះមហន្តរាយ និងប្រឆាំងបទល្មើស​ឆ្លងដែន នៅតាមបណ្តោយព្រំដែន ស្របតាមគោលការណ៍របស់ក្រសួងការពារជាតិនៃប្រទេសទាំងពីរ ។

ជាមួយនេះ ភាគីទាំងពីរ បានបង្ហាញមោទកភាព ចំពោះទំនាក់ទំនងកិច្ចសហប្រតិបត្តិការរវាងភាគីទាំងពីរ សម្រេច​បាន​នូវ​សមិទ្ធផលផ្លែផ្កាជាច្រើន រាប់ចាប់តាំងពីឆ្នាំ២០០៤មក ជាពិសេស MOU ស្តីពីកិច្ចសហប្រតិបត្តិការកាល​ពីថ្ងៃទី៣ ខែកុម្ភៈ ឆ្នាំ២០២១ ដោយអនុស្សារណៈនេះ ពិតជាបានដើរតួនាទីយ៉ាងសំខាន់ក្នុងការពង្រឹងបន្ថែមទៀត និងលើកកម្ពស់ប្រសិទ្ធភាព នៃការងារសហការគ្រប់គ្រង និងការពារព្រំដែន ដើម្បីធានាការពារសន្តិសុខ សន្តិភាព មិត្តភាព ស្ថិរភាព កិច្ចសហប្រតិបត្តិការ និងអភិវឌ្ឍន៍ ។

ជាក់ស្តែង ទំនាក់ទំនងរវាងការិយាល័យទី២ នៃកងទ័ពជើងគោកកម្ពុជា និងស្នងការស្រាវជ្រាវព័ត៌មានសន្ដិសុខ បញ្ជាការដ្ឋានកងទ័ពការពារព្រំដែនវៀតណាម ក៏ឈានមកដល់ការបង្កើតយន្តការអចិន្ត្រៃយ៍ ដើម្បីជំរុញ​កិច្ចសហប្រតិបត្តិការកម្រិតអង្គភាពជំនាញ តាមរយៈការចុះហត្ថលេខារួមគ្នាលើលក្ខខណ្ឌស្ដីពីកិច្ចសហប្រតិបត្តិការ (ToR) រវាងអង្គភាពទាំងពីរ នៅក្នុងថ្ងៃនេះផងដែរ ៕ អត្ថបទ ៖ បាន សុខរិទ្ធិ