មន្ត្រីអនុវត្តច្បាប់របស់សហរដ្ឋអាមេរិក កាលពីថ្ងៃចន្ទ បានចាប់ខ្លួនពលរដ្ឋទីក្រុងញូវយ៉កពីរនាក់​ពីបទចោទប្រកាន់ថាបានធ្វើប្រតិបត្តិការ «ស្ថានីយនគរបាលសម្ងាត់» របស់ចិននៅ Chinatown ទីក្រុង Manhattan ជាផ្នែកមួយនៃការបង្ក្រាបដែលតាមការចោទប្រកាន់បាន​ដាក់គោលដៅលើ​អ្នកប្រឆាំងក្រុងប៉េកាំង ដែលមានមូលដ្ឋាននៅសហរដ្ឋអាមេរិក។

លោក Lu Jianwang អាយុ ៦១ ឆ្នាំ និងលោកស្រី Chen Jinping អាយុ ៥៩ ឆ្នាំ ប្រឈមការចោទ​ប្រកាន់​ពីបទសមគំនិតក្នុងការធ្វើសកម្មភាពជាភ្នាក់ងាររបស់រដ្ឋាភិបាលចិន ដោយពុំបានជូនដំណឹង​ដល់អាជ្ញាធរ​សហរដ្ឋអាមេរិក និងធ្វើឲ្យរាំងស្ទះដល់យុត្តិធម៌។

ក្រសួងយុត្តិធម៌បាននិងកំពុងបង្កើនការស៊ើបអង្កេតទៅលើអ្វីដែលខ្លួនហៅថា ជា«ការបង្ក្រាបឆ្លងដែន» ធ្វើឡើងដោយគូប្រជែងរបស់សហរដ្ឋអាមេរិក ដូចជាប្រទេសចិន និងអ៊ីរ៉ង់ ដើម្បីបំភិតបំភ័យគូប្រជែងនយោបាយដែលរស់នៅក្នុងសហរដ្ឋអាមេរិក។

លោក Breon Peace រដ្ឋអាជ្ញាសហព័ន្ធជាន់ខ្ពស់នៅទីក្រុង Brooklyn បាននិយាយថា យើងមិនអាច និងមិនអត់ធ្មត់ចំពោះការធ្វើទុក្ខបុកម្នេញរបស់រដ្ឋាភិបាលចិនលើសកម្មជនគាំទ្រលទ្ធិប្រជាធិបតេយ្យ ដែលបានស្វែងរកការជ្រកកោននៅក្នុងប្រទេសនេះទេ។

រដ្ឋអាជ្ញាកាលពីថ្ងៃចន្ទ បានបង្ហាញការចោទប្រកាន់លើមន្ត្រីចិនចំនួន ៣៤ នាក់ សម្រាប់ការចោទ​ប្រកាន់ថា​បានដំណើរការ «រៀបចំបង្កហេតុដោយចេតនា» និងរំខានដល់អ្នកប្រឆាំង​តាមបណ្តាញ​អ៊ីនធឺណិត រួមទាំងការរំខានដល់កិច្ចប្រជុំរបស់ពួកគេនៅលើវេទិកា​បច្ចេកវិទ្យារបស់​សហរដ្ឋ​អាមេរិក។

រដ្ឋអាជ្ញានិយាយថា មន្ត្រីរដ្ឋាភិបាលចិន៨នាក់ជាជនជាប់ចោទនៅក្នុងសំណុំរឿង​ដែលបានប្រកាស​កាលពីឆ្នាំ ២០២០ ដោយចោទប្រកាន់អតីតនាយកប្រតិបត្តិក្រុមហ៊ុន Zoom Video Communications Inc ZM.O ដែលមានមូលដ្ឋាននៅប្រទេសចិន ដោយការរំខានដល់កិច្ចប្រជុំតាមវីដេអូដែល​រំលឹក​ដល់ការតវ៉ានៅទីលានធានអានម៉ិនឆ្នាំ ១៩៨៩ ។

រដ្ឋអាជ្ញាបាននិយាយថាលោក Lu និងលោកស្រី Chen គឺជាពលរដ្ឋអាមេរិកទាំងពីរនាក់​ដែល​ដឹកនាំអង្គការមិនរកប្រាក់ចំណេញដែលបានចុះបញ្ជីបេសកកម្មរបស់ខ្លួនថាជាការផ្តល់កន្លែងជួបជុំសង្គមសម្រាប់ពលរដ្ឋមកពីខេត្ត Fujian របស់ប្រទេសចិន។