និស្សិត និងបុគ្គលិកប្រមាណ៨៨នាក់ បានជាប់នៅក្នុងសាលាវិស្វកម្មនៃសាកលវិទ្យាល័យ Khartoum បន្ទាប់ពីការផ្ទុះឡើងការប៉ះទង្គិចគ្នាកាលពីថ្ងៃសៅរ៍រវាងក្រុមប្រដាប់អាវុធជាគូប្រជែងមកពីកងកម្លាំងប្រដាប់អាវុធស៊ូដង់ និងកងកម្លាំងគាំទ្ររហ័សទាហានប៉ារ៉ា។

នៅក្នុងឃ្លីបវីដេអូមួយដែលត្រូវបានបង្ហោះកាលពីថ្ងៃចន្ទ និស្សិតម្នាក់ក្នុងចំណោមនិស្សិតដែលជាប់នៅក្នុងនោះ ឈ្មោះ Umar Farooq បានអង្វរសុំជំនួយ និងបាននិយាយថាអ្នកដែលជាប់នៅខាងក្នុងកំពុងប្រឈមមុខនឹងស្ថានភាពអស់សង្ឃឹម។ លោកនិយាយថា និស្សិតម្នាក់បានស្លាប់នៅក្នុងការប៉ះទង្គិចគ្នាកាលពីយប់ថ្ងៃអាទិត្យ ហើយម្នាក់ទៀតបានរងរបួសធ្ងន់។

យើងជានិស្សិតនៅសាកលវិទ្យាល័យ Khartoum ដែលបច្ចុប្បន្នស្ថិតទីតាំងនៅសាលាវិស្វកម្មនៅសាកលវិទ្យាល័យ Khartoum ។ ថ្ងៃនេះជាថ្ងៃទីបីហើយ ចាប់តាំងពីការប៉ះទង្គិចគ្នាបានផ្ទុះឡើងកាលពីថ្ងៃសៅរ៍។ យើងមានគ្នាប្រមាណ ៨៨ នាក់ ក្នុងនោះមានបុគ្គលិក ២០ នាក់ មនុស្សចាស់មួយចំនួន និស្សិតស្រីប្រហែល ៥ នាក់ និងស្ត្រី ២ នាក់ផ្សេងទៀត។

ស្ថានការណ៍ពិតជាអាក្រក់នៅពេលនេះ ការប៉ះទង្គិចបានចាប់ផ្តើមម្តងទៀតហើយវាកំពុងបន្ត។ និស្សិតម្នាក់បានស្លាប់នៅក្នុងការប៉ះទង្គិចគ្នាកាលពីម្សិលមិញ ហើយរហូតមកដល់ពេលនេះ យើងពុំអាចយកចេញសាកសពទៅកន្លែងផ្សេងបានទេ។ យើងក៏មានអ្នករងរបួសធ្ងន់ផងដែរ។ យើងគ្មានកន្លែងត្រូវទៅនោះទេ។ យើងកំពុងអំពាវនាវឱ្យប្រតិបត្តិការជួយសង្គ្រោះទាំងអស់ដើម្បីជួយសង្គ្រោះស្ថានភាពបច្ចុប្បន្នឱ្យបានឆាប់តាមដែលអាចធ្វើទៅបាន ដោយសារយើងគ្មានការផ្គត់ផ្គង់ និងគ្មានអាហារ។

វីដេអូបង្ហាញពីបន្ទប់មួយនៅខាងក្នុងសាកលវិទ្យាល័យដែលពេញទៅដោយមនុស្សជ្រកកោនពីអំពើហិង្សាដែលកំពុងកើនឡើងនៅខាងក្រៅ។ សហជីពគ្រូពេទ្យប្រទេសស៊ូដង់បាននិយាយនៅក្នុងសេចក្តីថ្លែងការណ៍ថា យ៉ាងហោចណាស់ជនស៊ីវិល១៨៥នាក់បានស្លាប់ និងរបួស១៨០០នាក់ផ្សេងទៀត ក្នុងការប៉ះទង្គិចគ្នានៅក្នុងរដ្ឋធានី Khartoum ប្រទេសស៊ូដង់ដែលបានផ្ទុះឡើងចាប់តាំងពីថ្ងៃសៅរ៍។