ភ្នំពេញ​ ៖ អាជ្ញាធរខណ្ឌដូនពេញរក្សាបរិស្ថានអនាម័យសន្តិសុខសណ្ដាប់ធ្នាប់សាធារណៈបានល្អប្រសើរជូនប្រជាពលរដ្ឋដែលមកលេងសង្ក្រាន្តវត្តភ្នំ រយៈពេល ៣ ថ្ងៃមកនេះ ដែលមានពលរដ្ឋមកលេងយ៉ាងច្រើនកុះករ។

បន្ទាប់ពីកម្មវិធីសង្ក្រាន្តនៅរមណីយដ្ឋានប្រវត្តិសាស្ត្រវត្តភ្នំរយៈពេល០៣ថ្ងៃត្រូវបានបញ្ចប់ លោក ជា ខេមា អភិបាលនៃគណៈអភិបាលខណ្ឌដូនពេញ

បានដឹកនាំកម្លាំងគណៈបញ្ជាការ​បាញ់ទឹកលាងសំអាតទាំងខាងក្នុង និងខាងក្រៅ បរិវេណ រមណីយដ្ឋានប្រវត្តិសាស្រ្តវត្តភ្នំ និងតាមបណ្ដោយមហាវិថី​មួយចំនួននៅក្នុងមូលដ្ឋានខណ្ឌដូនពេញ។

លោក ជា ខេមា អភិបាលនៃគណៈអភិបាលខណ្ឌដូនពេញបានផ្ដល់បទសម្ភាសន៍ជាមួយ BTV ឲ្យដឹងនៅព្រឹកថ្ងៃទី១៨ ខែមេសា ឆ្នាំ២០២៣ នេះថា កម្មវិធីសង្ក្រាន្ត​នៅរមណីយដ្ឋានប្រវត្តិសាស្ត្រវត្តភ្នំរយៈពេល០៣ ថ្ងៃ កម្លាំងអាជ្ញាធរបានរក្សាសន្តិសុខសណ្ដាប់ធ្នាប់ជូនពលរដ្ឋដែលមកលេងកម្សាន្ត​បាន​ល្អប្រសើរមិនមាន​អ្វីឲ្យប៉ះពាល់​ដល់ពលរដ្ឋនៅឡើយ។ ពលរដ្ឋរាប់ម៉ឺននាក់បានមកលេងកំសាន្តនៅរមណីយដ្ឋានវត្តភ្នំទាំងយប់ទាំងថ្ងៃ បង្កភាពសប្បាយរីករាយក្រៃលែង។

លោកបានបន្ថែមទៀតថារៀងរាល់យប់ពេលពលរដ្ឋឈប់លេងកម្សាន្តអាជ្ញាធរតែងបាញ់ទឹកលាងសំអាតជារៀងរាល់យប់ដើម្បីឲ្យពលរដ្ឋ​មកលេងកម្សាន្តនៅ​ថ្ងៃបន្ទាប់មានភាព​ល្អប្រសើរនិងសោភ័ណភាព មានភាពទាក់ទាញទាំងភ្ញៀវជាតិនិងអន្តរជាតិ។

ក្រោយពីបញ្ចប់កម្មវិធីសង្ក្រាន្តវត្តភ្នំ រដ្ឋបាលខណ្ឌដូនពេញ បានបញ្ជារអោយកម្លាំងបញ្ជាការឯកភាពខណ្ឌបានចុះធ្វើការបាញ់លាងសម្អាតក្នុងនិងក្រៅបរវេណ​រមណីយដ្ឋានវត្តភ្នំនិង បោះសំអាតសំរាមផ្សេងឲ្យមានសណ្តាប់ធ្នាប់និងរបៀបរៀបរយឡើងវិញ ៕​ ដោយ ៖ កុម្ភះ

​

​