ភ្នំពេញ៖ ខណៈដែលពិធីបុណ្យប្រពៃណីជាតិខ្មែរ ត្រូវបានបញ្ចប់ប្រកបដោយភាពសប្បាយរីករាយ​នៅទូទាំងរាជធានី ខេត្តនៃប្រទេសកម្ពុជា នៅព្រឹកថ្ងៃទី១៨ ខែមេសា ឆ្នាំ២០២៣នេះ គេបានមើល​ឃើញ​ថា កម្មករ កម្មការិនី រោងចក្រកាត់ដេរ បានវិលត្រឡប់ចូលបំពេញការងារ​ឡើងវិញហើយ ជាមួយនឹងទឹកមុខសប្បាយរីករាយ។

ក្រុមកម្មការិនីរោងចក្រកាត់ដេរ ស្ថិតនៅតំបន់ទ្រុងមាន់ ខណ្ឌមានជ័យ រាជធានីភ្នំពេញ បានលើក​ឡើងថា ក្នុងថ្ងៃឈប់សម្រាកនាឱកាសបុណ្យចូលឆ្នាំនៅស្រុកកំណើតឆ្នាំនេះ មានក្តីសប្បាយ​រីករាយ​ជាងឆ្នាំកន្លងៗទៅ ដោយសារតែបានជួបជុំគ្រួសារ និង​សាច់ញាតិ ជាពិសេសបានចូលរួម​ការរៀបចំពិធី​សង្រ្កាន្ត​នានា​នៅតាមតំបន់រមណីយដ្ឋាន និងទីវត្តអារាម ក៏ដូចជាបានលេងល្បែង​ប្រជាប្រិយ​ជាមួយបងប្អូនជិតឆ្ងាយ ​អមជាមួយ​នឹង​បរិយាកាស​អធិកអធម​ ក្រោម​ប្រទេសមាន​សុខសន្តិភាព។

ពួកគាត់ឲ្យដឹងទៀតថា អ្វីដែលធ្វើឲ្យពួកគាត់កាន់តែរីករាយថែមទៀតនោះ គឺអាចវិលត្រឡប់ និងចូលបំពេញការងារបានជាធម្មតាឡើងវិញ ​បន្ទាប់ពីសម្រាកអំឡុងពេលចូលឆ្នាំខ្មែរ។

សូមបញ្ជាក់ថា ជារៀងរាល់ឆ្នាំ ​ក្នុងអំឡុងបុណ្យទានធំៗ ​ក៏ដូចជាពិធីបុណ្យចូលឆ្នាំខ្មែរ ប្រជាពលរដ្ឋ​ភាគច្រើន​តែងតែចាកចេញពីរាជធានីភ្នំពេញទៅជួបជុំក្រុមគ្រួសារនៅស្រុកកំណើត និងខ្លះទៀត​ធ្វើដំណើរកម្សាន្តទាំងក្នុងនិងក្រៅប្រទេស។

សម្រាប់ឆ្នាំ២០២៣នេះ ប្រមុខរដ្ឋាភិបាលបាន​ប្រកាស​អនុញ្ញាត​ឱ្យ​កម្មករ​និយោជិតទាំងអស់​សម្រាក​ដោយទទួល​បានប្រាក់ឈ្នួលរយៈពេល ​៣ថ្ងៃ ចាប់ពីថ្ងៃ១៤ ដល់ថ្ងៃទី១៦​ ខែមេសា ឆ្នាំ២០២៣៕

អត្ថបទ៖ ឈិត បូរ៉ាវី