ភ្នំពេញ៖ អំឡុងពេល៣ថ្ងៃ បុណ្យចូលឆ្នាំថ្មីប្រពៃណីខ្មែរ ក្រសួងទេសចរណ៍បង្ហាញតួលេខថា មានភ្ញៀវទេសចរជាតិអន្តរជាតិដើរកម្សាន្តជាង១៣លាននាក់។ អាជីវកម្មនានា ក្នុងវិស័យទេសចរណ៍ ទទួលបានកំណើនភ្ញៀវទេសចរជាតិ និងអន្តរជាតិ ចូលទទួលសេវាច្រើនជាងឆ្នាំកន្លងទៅ។
លោកស្រី ឆាយ សៀវលីន ប្រធានសមាគមទីភ្នាក់ទេសចរណ៍កម្ពុជា CATA ថ្លែងប្រាប់BTV នៅថ្ងៃទី១៨ ខែមេសានេះ នៅក្នុងអំឡុងឱកាសបុណ្យចូលឆ្នាំថ្មីប្រពៃណីខ្មែរ ចំនួន៣ថ្ងៃ គ្រប់បណ្តាអាជីវកម្មដែលជាដៃគូការីទេសចរណ៍មានដូចផ្ទះសំណាក់ សណ្ឋាគារ ភោជនីយដ្ឋាន ក្រុមរថយន្តដឹកជញ្ជូន គោលដៅរមណីយដ្ឋានទេសចរណ៍នានាទៀតតាមបណ្តាខេត្ត ទទួលបានភ្ញៀវជាតិ និងអន្តរជាតិចូលទទួលសេវាពេញៗ ជាពិសេសនោះ ពលរដ្ឋខ្មែរបានននាំគ្នាប្រើប្រាស់កញ្ចប់សេវាទេសចរណ៍ ដើម្បីដើរកម្សាន្តនៅថ្ងៃបុណ្យចូលឆ្នាំថ្មីនេះ។
លោក រឿន ភូមិរ៉ា ប្រធានក្រុមហ៊ុនទេសចរណ៍តាខ្មៅ ហូលីដេ លើកឡើងថា នៅក្នុងអំឡុងថ្ងៃបុណ្យចូលថ្មីនេះ មានពលរដ្ឋខ្មែរជាច្រើន បាននាំគ្នាប្រើប្រាស់កញ្ចប់ទេសចរណ៍ ភាគច្រើនតែលើការស្នើកក់បន្ទប់ផ្ទះសំណាក់ សណ្ឋាគារ ការប្រើប្រាស់រថយន្តទេសចរណ៍ ទៅតាមគោលដៅទេសចរណ៍នៅតាមបណ្តាខេត្ត ។ ដោយឡែកសម្រាប់ភ្ញៀវអន្តរជាតិ គឺមានតម្រូវការប្រើប្រាស់កញ្ចប់ទេសចរណ៍ពេញៗ តែម្តង ពោលគឺតម្រូវការទាំងមគ្គុទ្ទេសក៍ទេសចរណ៍ បន្ទប់ស្នាក់តាមសណ្ឋាគារលំដាប់ផ្កាយ និងការធ្វើដំណើរជាដើម។
ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ ថ្លែងថា ចំនួនទេសចរដើរកម្សាន្តថ្ងៃបុណ្យចូលឆ្នាំថ្មីចំនួនជាង ១៣លាននាក់នោះ គឺមានកំណើនឡើងខ្ពស់ជាងព្រឹត្តិការណ៍បុណ្យចូលឆ្នាំថ្មីកាលកម្ពុជាមិនទាន់ជួបវិបត្តិកូវីដ១៩ទៅទៀត ហើយចំនួនកំណើនភ្ញៀវទេសចរនេះ បានធ្វើឲ្យអាជីវកម្មទេសចរណ៍ក្នុងប្រព័ន្ធ និងក្រៅប្រព័ន្ធ រហូតអ្នកលក់ដូរតូចតាចនានាគឺអាចរកចំណូលបានកាក់កបទាំងអស់គ្នា បើតាមបណ្តាអាជីវកម្មទេសចរណ៍មួយចំនួនបានធ្វើការដំឡើងថ្លៃ ប៉ុន្តែមិនមានការប្តឹងតវ៉ា ពីសំណាក់ភ្ញៀវចូលទទួលសេវានោះទេ៕ អត្ថបទ ស៊ុម សុខជា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
