ភ្នំពេញ៖ ស្ថានទូតជប៉ុនប្រចាំនៅកម្ពុជា បានឱ្យដឹងថា យុវជនកម្ពុជាចំនួន ១០ រូបដែលពាក់ព័ន្ធនឹងនយោបាយ នឹងអញ្ជើញទៅធ្វើ ទស្សនកិច្ចនៅប្រទេសជប៉ុន ដែលជាផ្នែកមួយនៃកម្មវិធីផ្លាស់ប្តូរយុវជនរបស់ក្រសួង ការបរទេសជប៉ុន ហៅថា JENESYS ចាប់ពីថ្ងៃទី១៩ ដល់២៦ ខែមេសានេះ ខណៈកម្មវិធីនេះធ្វើឡើងតាំងពីឆ្នាំ ២០១៨ ដើម្បីគាំទ្រការអភិវឌ្ឍតាមបែបប្រជាធិបតេយ្យរបស់ប្រទេសកម្ពុជា។

​យោងតាមសេចក្ដីប្រកាសព័ត៌មានរបស់ស្ថានទូតជប៉ុនប្រចាំនៅកម្ពុជា ស្ដីពី កម្មវិធីអញ្ជើញយុវជនកម្ពុជា​ពាក់ព័ន្ធនឹង​នយោបាយ ទៅកាន់ប្រទេសជប៉ុន ដែល BTV ទទួលបាននៅថ្ងៃទី១៨ ខែមេសា ឆ្នាំ២០២៣នេះបានឱ្យដឹងថា យុវជន​កម្ពុជាប់ពាក់ព័ន្ធនឹងនយោបាយទាំង១០រូប ដែលចូលរួមទៅធ្វើទស្សនកិច្ចនៅប្រទេសជប៉ុន១សប្ដាហ៍រួមមាន ចំនួន ២ រូប មកពីគណបក្សកាន់អំណាច ៧ រូបមកពីគណបក្សប្រឆាំង និង ១ រូបមកពីស្ថាប័នស្រាវជ្រាវ (Think-Tank) ។

សេចក្ដីប្រកាសព័ត៌មាន បញ្ជាក់ថា កម្មវិធីនេះ បានដំណើរការចាប់តាំងពីឆ្នាំ២០១៨ ដើម្បីគាំទ្រការអភិវឌ្ឍតាមបែប ប្រជាធិបតេយ្យរបស់ប្រទេសកម្ពុជា តាមរយៈការជំរុញការសន្ទនារវាងគណបក្ស កាន់អំណាច គណបក្សប្រឆាំង និងអ្នកដទៃទៀត ហើយដំណើរទស្សនកិច្ចលើកនេះ គឺជាកម្មវិធីលើកទី៥ ហើយ។

ស្ថានទូតជប៉ុនបញ្ជាក់ថា អ្នកចូលរួមទាំង ១០ រូប នឹងអញ្ជើញទៅធ្វើទស្សនកិច្ចនៅវិមានរដ្ឋសភាជាតិ និងមានការ​ផ្លាស់ប្តូរ​យោបល់ជាមួយតំណាងរាស្ត្រជប៉ុននៃក្រុមមិត្តភាពតំណាងរាស្ត្រជប៉ុន- កម្ពុជា។ អ្នកចូលរួមក៏នឹងអញ្ជើញទៅធ្វើទស្សនកិច្ចនៅខេត្ត មីយ៉ាសាគិ (Miyazaki) ដើម្បីសង្កេតមើលដំណើរការបោះឆ្នោត​សភាក្រុងមីយ៉ាសាគិ និងសិក្សាស្វែងយល់អំពី សកម្មភាពលើកស្ទួយខេត្ត មីយ៉ាសាគិ ផងដែរ៕ អត្ថបទ៖ វ៉ន ដារ៉ា