ភ្នំពេញ៖ ក្រសួងទេសចរណ៍នៅថ្ងៃទី១៨ ខែមេសា ឆ្នាំ២០២៣នេះ បានប្រកាស សូមស្វាគមន៍មកកាន់វេទិកាទេសចរណ៍មេគង្គឆ្នាំ២០២៣ ក្រោមប្រធានបទ «គិតគូរឡើងវិញពីភាពធន់ និងឌីជីថលនីយកម្ម» (Rethink Resilience and Digitalization) នឹងចាប់ផ្តើមពីថ្ងៃទី២៤ ដល់ ២៨ ខែមេសា ឆ្នាំ២០២៣ នៅសណ្ឋាគារឯករាជ្យខេត្តព្រះសីហនុ។

ឯកឧត្ដម ជុក ជំនោរ អ្នកនាំពាក្យ ក្រសួងទេសចរណ៍ បានឱ្យដឹងថា វេទិកាទេសចរណ៍មេគង្គឆ្នាំ២០២៣ ក្រោមប្រធានបទ «គិតគូរឡើងវិញពីភាពធន់ និងឌីជីថលនីយកម្ម» នឹងជួបជាមួយបទបង្ហាញរបស់អ្នកជំនាញអន្តរជាតិជាច្រើនរូបលើប្រធានបទចំនួន ២ រួមមាន ទី១ ការគិតគូរឡើងវិញពីវិស័យទេសចរណ៍ និងទី២ គិតគូរឡើងវិញពីប្រព័ន្ធចំណីអាហារក្នុងវិស័យទេសចរណ៍។

ឯកឧត្ដម បានបញ្ជាក់ថា ក្រៅពីនេះវេទិកាទេសចរណ៍មេគង្គឆ្នាំ២០២៣ ក៏មានរៀបចំកិច្ចពិភាក្សា (Panelist Discussion) ចំនួន ៣បន្ថែមទៀត រួមមានទី១ ទេសចរណ៍វ័យឆ្លាត និងគោលដៅទេសចរណ៍វ័យឆ្លាតតាមរយៈបច្ចេកវិទ្យា (Smart Tourism and Smart Destination via Digitalization)។ ទី២គិតគូរឡើងវិញពីវិស័យម្ហូបអាហារ ដើម្បីការពារភពផែនដី (Rethinking Food System- A lever to protect the Planet) និង ទី៣ ការពង្រឹងមូលធនមនុស្ស ដើម្បីភាពធន់ក្នុងវិស័យទេសចរណ៍ (Advancing Human Capital… Advancing Industry Resilience)។

បើតាមឯកឧត្ដម ជំនោរ កិច្ចពិភាក្សាចំនួន៣នេះ ក៏មានការចូលរួមពីអ្នកសម្របសម្រួល និងវាគ្មិនជាតិ និងអន្តរជាតិ ដែលមកពីស្ថាបនសាធារណៈ ឯកជន និងអ្នកជំនាញការអន្តរជាតិនានាជាច្រើនរូបផងដែរ៕ អត្ថបទ៖ វ៉ន ដារ៉ា