ភ្នំពេញ ៖ ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល នារសៀលថ្ងៃទី១៨ ខែមេសា ឆ្នាំ២០២៣នេះ បានអញ្ជើញជាអធិបតីក្នុងពិធីចុះហត្ថលេខាលើគម្រោងកិច្ចសហការ ក្នុងការបណ្តុះបណ្តាល ការផ្លាស់ប្តូរការសិក្សា ការផ្តល់ជូននូវឧបករណ៍បរិក្ខារពេទ្យ និងការបញ្ជូនអ្នកជំងឺរវាងមនី្ទរពេទ្យជាតិ ចំនួនពីរ គឺមនី្ទរពេទ្យមិត្តភាពកម្ពុជា-ចិន ព្រះកុសុមៈ និងមនី្ទរពេទ្យព្រះអង្គឌួង និងមនី្ទរពេទ្យបង្អែកខេត្តចំនួនពីរ គឺរួមមានមនី្ទរពេទ្យបង្អែក ខេត្តបាត់ដំបង និងខេត្តកំពង់ចាម នៃព្រះរាជាណាចក្រកម្ពុជា ជាមួយមនី្ទរពេទ្យ Gabriel CHU CLERMONT-FERRAND et Hopital Purpan CHU Toulouse ប្រទេសបារាំង។

​ក្នុងពិធីចុះហត្ថលេខាលើគម្រោងកិច្ចសហការក្នុងការបណ្តុះបណ្តាល ការផ្លាស់ប្តូរការសិក្សា ការផ្តល់ជូននូវ​ឧបកណ៍បរិក្ខារពេទ្យ និងការបញ្ជូនអ្នកជំងឺ រវាងមនី្ទរពេទ្យជាតិ ចំនួនពីរ និងមនី្ទរពេទ្យបង្អែកខេត្ត ចំនួនពីរ ជាមួយមនី្ទរពេទ្យសាកលវិទ្យាល័យប្រទេសបារាំងនេះ ធ្វើឡើងរវាងឯកឧត្តមវេជ្ជបណ្ឌិតឯកទេស តាន់ សុគុន នាយកមនី្ទរពេទ្យមិត្តភាពកម្ពុជា-ចិន ព្រះកុសុមៈ និងProf. Thierry Mom និងProf. Olivier DEGUINE, ឯកឧត្តម វេជ្ជបណ្ឌិត លូ លីឃាង នាយកមនី្ទរពេទ្យព្រះអង្គឌួង, លោកវេជ្ជបណ្ឌិត កាក់ សីលា នាយកមនី្ទរពេទ្យបង្អែក ខេត្តបាត់ដំបង និងលោកសាស្រ្តាចារ្យ យិន ស៊ីណា នាយកមនី្ទរពេទ្យបង្អែក ខេត្តកំពង់ចាម។

នាឱកាសនោះឯកឧត្តមវេជ្ជបណ្ឌិតឯកទេស តាន់ សុគុន នាយកមនី្ទរពេទ្យមិត្តភាពកម្ពុជា-ចិន ព្រះកុសុមៈ បានគោរពថ្លែងអំណរគុណចំពោះឯកឧត្តម សាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល ដែលបានផ្តល់កិតិ្តយសជាអធិបតីក្នុងពិធីចុះហត្ថលេខាលើគម្រោងកិច្ចសហប្រតិបតិ្តការរវាងមនី្ទរពេទ្យថ្នាក់ជាតិ និង​មនី្ទរពេទ្យបង្អែកខេត្ត ជាមួយមនី្ទរពេទ្យ Gabriel CHU CLERMONT-FERRAND et Hopital Purpan CHU Toulouse ប្រទេសបារាំង៕ អត្ថបទ៖ រដ្ឋា