ភ្នំពេញ៖ នាឱកាសបុណ្យចូលឆ្នាំថ្មីប្រពៃណីជាតិខ្មែរ ឆ្នាំ២០២៣នេះ សេវារថយន្តក្រុង​សាធារណៈរបស់រដ្ឋបានទទួលការគាំទ្រយ៉ាងខ្លាំងពីប្រជាពលរដ្ឋ សម្រាប់ជិះទៅមកស្រុកកំណើតដោយឥតគិតថ្លៃ បើតាមការបញ្ជាក់ពីមន្ដ្រីរដ្ឋបាលរាជធានីមានពលរដ្ឋប្រមាណជិត៥ម៉ឺននាក់ បានជិះរថយន្តក្រុងនេះ។

លោក ម៉េត មាសភក្តី អ្នកនាំពាក្យរដ្ឋបាលរាជធានីភ្នំពេញ បានឱ្យដឹងថា នៅក្នុងឱកាសបុណ្យ​ចូលឆ្នាំថ្មីប្រពៃណីជាតិខ្មែរឆ្នាំនេះ មានប្រជាពលរដ្ឋប្រមាណជិត៥ម៉ឺននាក់បានមកទទួល​យកសេវារថយន្តក្រុងសាធារណៈរបស់រដ្ឋ ។លោកបន្ថែមថា ខ្សែរត់តាមផ្លូវជាតិលេខ៦ មានអ្នកជិះរហូតដល់ជិត២ម៉ឺននាក់ ដែលជាតួលេខច្រើនជាងគេ ។

លោក ម៉េត មាសភក្ដី បានបន្តថា អនុវត្តតាមអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី រដ្ឋបាលរាជធានីភ្នំពេញ បានបញ្ចេញរថយន្តក្រុងដឹកអ្នកដំណើរចំនួន ៣៤៥គ្រឿង​ដោយ​ឥតគិតថ្លៃ សម្រាប់បម្រើសេវាដឹកជញ្ជូនសាធារណៈ ដើម្បីសម្រួលដល់ការចំណាយជូន​ប្រជាពលរដ្ឋ ក្នុងការធ្វើដំណើរទៅមកស្រុកកំណើតអាចជួបជុំបងប្អូនក្រុមគ្រួសារ ក្នុងពិធីបុណ្យ​ចូលឆ្នាំថ្មីប្រពៃណីជាតិ។

សូមរំលឹកថា សេវាដឹកជញ្ជូនសាធារណៈរបស់រដ្ឋ ដែលសម្រាប់ដឹកប្រជាពលរដ្ឋក្នុងរាជធានីភ្នំពេញ​នាបុណ្យចូលឆ្នាំខ្មែរឆ្នាំនេះ គឺប្រើប្រាស់រថយន្តចំនួន ៧០គ្រឿង និងសម្រាប់សេវា​ដឹកជញ្ជូន​ប្រជាពលរដ្ឋ ដែលធ្វើដំណើរចេញពីរាជធានីភ្នំពេញទៅតាមបណ្តាខេត្ត និងតាមបណ្តាខេត្តមក​រាជធានីភ្នំពេញវិញ ប្រើប្រាស់រថយន្ត ចំនួន២៧៥គ្រឿង ដោយមានកំណត់ទីតាំង គោលដៅចេញ ដំណើរ និងពេលវេលាច្បាស់លាស់ ហើយក៏ត្រូវបានទទួលការទទួលយក និងសាទរពីប្រជា​ពលរដ្ឋផងដែរ។

ទន្ទឹមនឹងការផ្តល់សេវារថយន្តក្រុងសាធារណៈដោយឥតគិតថ្លៃនេះដែរ រដ្ឋបាលរាជធានីភ្នំពេញ ក៏បានអំពាវនាវដល់ម្ចាស់ក្រុមហ៊ុន និងម្ចាស់រថយន្តដឹកជញ្ជូនអ្នកដំណើរឯកជនទាំងអស់​កុំឱ្យ​ដំឡើង​ថ្លៃសេវាដឹកជញ្ជូន ក្នុងឱកាសបុណ្យ ចូលឆ្នាំថ្មីប្រពៃណីជាតិនេះផងដែរ ដើម្បីរួមចំណែកជាមួយរាជរដ្ឋាភិបាល​ ក៏ដូចជារដ្ឋបាលរាជធានីភ្នំពេញ ក្នុងការជួយសម្រួល​ដល់ជីវភាពរស់នៅ របស់ប្រជាពលរដ្ឋ៕