កាលពីថ្ងៃអង្គារប្រទេសចិន បានជំរុញក្រុមប្រទេស G7 ឲ្យបញ្ឈប់ការបង្កើតការខ្វែងគំនិតគ្នាឬ ដុតបញ្ឆេះឲ្យមានការប្រឈមដាក់គ្នារវាងក្រុមសម្ព័ន្ធមិត្ត ជាការឆ្លើយតទៅនឹងសេចក្ដីថ្លែងការណ៍មួយ ធ្វើឡើងដោយបណ្តារដ្ឋមន្ត្រីការបរទេសនៃក្រុម​ប្រទេស​មានឧស្សាហកម្មលូតលាស់ទាំង៧ ដែលទីក្រុងប៉េកាំងបាននិយាយថា ជាការលាបពណ៌។

លោក Wang Wenbin អ្នកនាំពា្យក្រសួងការបរទេសចិន បាននិយាយនៅសន្និសីទសារព័ត៌មាន​ប្រចាំថ្ងៃក្នុងទីក្រុងប៉េកាំងថា ក្រុមប្រទេស G7 មិនអើពើចំពោះជំហររបស់ចិន ច្រានចោលការពិត ជ្រៀតជ្រែកពេញទំហឹងនៅក្នុងកិច្ចការផ្ទៃក្នុងរបស់ចិន និងបង្កាច់បង្ខូច បន្ទច់បង្អាក់ចិនដោយចេតនា ។

លោក Wang បាននិយាយថា ប្រទេសចិន បានបង្ហាញការមិនពេញចិត្តជាខ្លាំង ព្រមទាំងជំទាស់​ដាច់ខាតចំពោះបញ្ហានេះ និងបាននិយាយខ្លាំងៗទៅកាន់ប្រទេសជប៉ុន ដែលបានធ្វើជាម្ចាស់​ផ្ទះរៀបចំកិច្ចប្រជុំថ្នាក់រដ្ឋមន្ត្រីការបរទេសរបស់នៃក្រុមប្រទេសជាសមាជិក G7 រយៈពេល៣ថ្ងៃ។

នៅក្នុងសេចក្តីថ្លែងការណ៍រួមមួយដែលបានចេញផ្សាយកាលពីថ្ងៃអង្គារបន្ទាប់ពីកិច្ចប្រជុំដែលបានធ្វើឡើងនៅកណ្តាលប្រទេសជប៉ុន ក្រុមប្រមុខការទូតG7 បានអះអាងជាថ្មីនូវអ្វីដែលពួកគេ​បាននិយាយថា "សារៈសំខាន់នៃសន្តិភាព និងស្ថិរភាពនៅទូទាំងច្រកសមុទ្រតៃវ៉ាន់" ហើយបាន​សម្តែង​ការព្រួយបារម្ភអំពីសមុទ្រចិនខាងកើត សមុទ្រចិនខាងត្បូង និងតំបន់ស្វយ័តស៊ីនជាំង និងទីបេតិ៍។

ដោយកត់សម្គាល់ពីស្ថិរភាពបច្ចុប្បន្ននៅសមុទ្រចិនខាងកើត និងសមុទ្រចិនខាងត្បូង លោក Wang បានជំរុញឲ្យ បណ្តាប្រទេសពាក់ព័ន្ធ គោរពកិច្ចខិតខំប្រឹងប្រែងរបស់ប្រទេសក្នុងតំបន់ដើម្បី​ការពារសន្តិភាព និងស្ថិរភាព ហើយបញ្ឈប់ការបង្កជម្លោះរវាងគ្នានិងគ្នា ឬបង្កើតការប្រឈមដាក់គ្នា​រវាងក្រុមប្រទេសជាសម្ព័ន្ធមិត្តរបស់ខ្លួន៕