សិស្សសាលារាប់រយនាក់បាននាំគ្នាដើរចេញពីថ្នាក់រៀន នៅក្នុងទីក្រុងកាន់សាស់ (Kansas City) សហរដ្ឋអាមេរិក កាលពីថ្ងៃអង្គារទី១៨មេសា ដើម្បីតវ៉ាទៅនឹងការបាញ់យុវជនស្បែកខ្មៅម្នាក់ ដែលបានរងរបួស បន្ទាប់ពីដើរចូលខុសផ្ទះ នៅពេលរូបគេទៅទទួលប្អូនភ្លោះរបស់ខ្លួន។

រូបភាពថតពីលើអាកាសបានបង្ហាញពីសិស្សសាលាកំពុងដើរចេញពីវិទ្យាល័យ Staley ជាទីដែលជនរងគ្រោះ ឈ្មោះ Ralph Yarl កំពុងសិក្សា។

រដ្ឋអាជ្ញានិយាយថា បុរសវ័យ៨៤ឆ្នាំ Andrew Lester ត្រូវបានចោទប្រកាន់ពីបទវាយប្រហារកម្រិតទី១ ដែលអាចជាប់ពន្ធនាគារអស់មួយជីវិត និងទោសព្រហ្មទណ្ឌពីបទប្រើប្រាស់អាវុធចំពោះការបាញ់​ប្រហារ​យុវជនវ័យ១៦ឆ្នាំឈ្មោះ Yarl នៅមាត់ទ្វារផ្ទះរបស់លោកនៅជាយក្រុងប្រហែលម៉ោង១០យប់ កាលពីថ្ងៃព្រហស្បតិ៍ទី១៣មេសា ។

រដ្ឋអាជ្ញានិយាយថា លោក Lester បានបាញ់២គ្រាប់តាមទ្វារកញ្ចក់ដោយប្រើកាំភ្លើងខ្លី ម៉ាក 32-caliber ដែលត្រូវចំក្បាល និងដៃ ។

គ្រួសាររបស់ជនរងគ្រោះនិយាយថា យុវជនរូបនេះ បានធូរស្រាលខណៈកំពុងព្យាបាលរបួស​នៅផ្ទះរបស់ខ្លួនកាល​ពីថ្ងៃចន្ទទី១៧មេសា៕