ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ណែនាំក្រុម​សង្គ្រោះ​សត្វព្រៃ បង្កើនទំនុកចិត្តលើការអភិរក្សសត្វព្រៃដល់មហាជន។

ឯកឧត្តម ឌិត ទីណា លើកឡើងបែបនេះ ក្នុងកិច្ចប្រជុំមួយ កាលពីរសៀលថ្ងៃទី១៨ មេសា ឆ្នាំ២០២៣នេះ ជាមួយក្រុមសង្គ្រោះសត្វព្រៃបន្ទាន់របស់កញ្ញាបណ្ឌិត ស៊ូវណ្ណា ហ្គោនឡែត នាយិកាប្រតិបត្តិអង្គការសម្ព័ន្ធមិត្តសត្វព្រៃ (Wildlife Alliance) ប្រចាំកម្ពុជា​ នៅទីស្តីការក្រសួង។

ក្នុងកិច្ចប្រជុំនាឱកាសនេះ ​ឯកឧត្តមរដ្ឋមន្ត្រី ​បានណែនាំឱ្យក្រុមការងារសង្គ្រោះសត្វព្រៃបន្ទាន់ ធ្វើការ​សហការគ្នាឱ្យបានល្អ ​កសាងទំនុកជាមួយគ្នា ​ធ្វើការរួមគ្នាលើការការពារនិងអភិរក្សសត្វព្រៃ ដោយ​ត្រូវមានផែនការ​ច្បាស់លាស់​ មានយុទ្ធសាស្ត្រឆ្លើយតប​នឹងបញ្ហាជាក់ស្តែង និងស្ថានភាព​កាលៈទេសៈភ្លាមៗ​ប្រកបដោយប្រសិទ្ធភាព​ និងនិរន្តរភាព។

ទាក់ទងនឹងការងារនេះ ត្រូវធ្វើយ៉ាងណាឱ្យស្របច្បាប់ ​និងទទួលបានការសាទរ ​គាំទ្រពីមហាជន ហើយ​ប្រសិនបើអ្នកមានឆន្ទៈចង់ចិញ្ចឹមសត្វ ​គឺចិញ្ចឹមឱ្យស្របច្បាប់ ដោយមិនមានការជួញដូរ​ឡើយ​។

លើសពីនេះទៀត​ ឯកឧត្តម បានណែនាំឱ្យក្រុមការងារ​សង្គ្រោះ​សត្វព្រៃ​បន្ទាន់នេះ ​ត្រូវ​ធ្វើ​ការងារ​ដោយ​តម្កល់​ប្រយោជន៍​ជាតិ​ជាធំ ​មានគោលដៅរួមតែមួយ ​យល់ពីគ្នាទៅវិញទៅមក និងរួមគ្នាដោះស្រាយបញ្ហា។

សូមបញ្ជាក់ថា ក្រសួងកសិកម្ម រុក្ខាប្រមាញ់ និងនេសាទ ​បានសហការជាមួយអង្គការសម្ព័ន្ធមិត្ត​សត្វព្រៃ ​ចាប់តាំងពីឆ្នាំ២០០១​ ដោយបានចុះកិច្ចព្រមព្រៀងអនុវត្តគម្រោងចំនួន ​៨មកហើយ និងបានចំណាយថវិកា​គម្រោងអស់ជាង ​៣៤,៥លានដុល្លាលើក្រុមការងារសង្គ្រោះសត្វព្រៃបន្ទាន់ កម្មវិធីថែទាំសត្វព្រៃ ​កម្មវិធីការពារព្រៃឈើតំបន់ជួរភ្នំក្រវាញ​ភាគខាងត្បូង និងគម្រោងអប់រំបរិស្ថាន​ចល័តចាប់តាំងពីឆ្នាំ២០០១ដល់២០១៦។

ក្រុមការងារនេះ ​គឺជាក្រុមអន្តរាគមន៍ដឹកនាំដោយរដ្ឋបាលព្រៃឈើប្រតិបត្តិការទូទាំងប្រទេសកម្ពុជា ដើម្បីទប់ស្កាត់ ​និងបង្ក្រាបបទល្មើសជួញដូរសត្វព្រៃ ​និងការដឹកជញ្ជូន​សំណាក​សត្វព្រៃខុសច្បាប់ ដែលមានសមាភាពមកពីរដ្ឋបាលព្រៃឈើ ​រដ្ឋបាលជលផល​ កងកម្លាំង​រាជអាវុធហត្ថលើ​ផ្ទៃប្រទេស និង​បុគ្គលិកអង្គការសម្ព័ន្ធមិត្តសត្វព្រៃសរុប ១៦រូប។

ចំពោះកម្មវិធីថែទាំសត្វព្រៃដែលសង្គ្រោះ​បាន​មាននៅឧទ្យានសួនសត្វ ​និងមជ្ឈមណ្ឌល​សង្គ្រោះ​សត្វព្រៃភ្នំតាម៉ៅ ​ការដោះលែងសត្វព្រៃនៅក្នុងព្រៃឧទ្យានអង្គរ ​និងនៅជីផាត​ ខេត្តកោះកុង៕ អត្ថបទ៖ឈិត បូរ៉ាវី