សៀមរាប៖ ពិធីបុណ្យចូលឆ្នាំថ្មីប្រពៃណីខ្មែរ បានបញ្ចប់ហើយក្ដី ប៉ុន្ដែប្រជាពលរដ្ឋខ្មែរ ក៏​ដូចជា​ភ្ញៀវទេសចរជាតិ និងអន្ដរជាតិ នៅតែបន្ដទស្សនាសួនបេះដូងបត់ នៅ​ក្នុងបរិវេណអង្គរ​ជាបន្ដបន្ទាប់ ដើម្បីផ្ដិតយករូបភាពទុកជាអនុស្សាវរីយ៍។

លោក ឡេក គឹមលីន ប្រធាន​គ្រប់គ្រង​ភ្នាក់ងារ​ទេសចរ​នៅប្រាសាទអង្គរ នៃ​អាជ្ញាធរជាតិអប្សរា បាន​ឱ្យដឹងថា ​ចាប់ពីថ្ងៃទី១៧ ខែមេសា ឆ្នាំ២០២៣នេះ​ អ្នកទេសចរជាតិ ​និងអន្ដរជាតិ ទៅ​ទស្សនា​បេះដូងបត់នៅសួនបេះដូង ក្នុងបរិវេណប្រាសាទអង្គរជាង ​៣ម៉ឺន៦ពាន់នាក់ បន្ទាប់ពី​បញ្ចប់​ពិធី​ព្រឹត្ដិការណ៍​អង្គរ​សង្ក្រាន្ដ ​នៃពិធីអបអរចូលឆ្នាំថ្មីប្រពៃណីខ្មែរ ប៉ុន្ដែភាគច្រើនជាអ្នកទេសចរជាតិ។

លោក បានបន្ដថា ​ពួកគាត់ទៅទស្សនាបេះដូងបត់នេះ ​បានថតរូបជាអនុស្សាវរីយ៍ ហើយបង្ហាញ​ពីភាព​សប្បាយរីករាយនូវរូបភាព​ដោតបេះដូង​ចេញ​ជា​រូបរាង​អក្សរ​បេះដូងខ្មែរ។

លោកថា នៅថ្ងៃខាងមុខនេះ ​ក្រុមការងាររៀបចំបេះដូងនឹងដកចេញវិញនាពេលឆាប់ៗខាងមុខនេះ ប៉ុន្ដែយ៉ាងនេះក្ដី ​មន្ដ្រីអាជ្ញាធរជាតិអប្សរា បាន​អំពាវនាវ​ឱ្យ​ប្រជាពលរដ្ឋ​ទៅ​ទស្សនាប្រាសាទ​អង្គរវត្ដ​បន្ដទៀត​ ហើយស្នើរឱ្យជួយថែរក្សាបរិស្ថាន​ គោរព​ក្រមប្រតិបត្ដិអង្គររួមមាន៖ ការ​ស្លៀកពាក់ខ្លី សិចស៊ី ហាមប៉ះក្បាច់ចម្លាក់​ ស្រែកឡូឡា ​ហាមជក់បារីជាដើម ​ដើម្បីរក្សា​ និងលើកតម្លៃវប្បធម៌ អរិយធម៌ខ្មែរ៕