ភ្នំពេញ ៖ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអនុញ្ញាតឲ្យ​ឯកឧត្តម W. Partrick Murphy ឯកអគ្គរដ្ឋទូតអាមេរិកប្រចាំកម្ពុជា និងក្រុមការងារចូលជួបសម្តែងការគួរសម និងពិភាក្សាការងារ នៅទីស្តីការក្រសួង ព្រឹកថ្ងៃទី១៩ ខែមេសា ឆ្នាំ២០២៣នេះ។

​ក្នុងជំនួបពិភាក្សាការងារនេះ ក្រោយបញ្ចប់ពិធីបុណ្យចូលឆ្នាំថ្មី ឆ្នាំថោះ ២០២៣ ឯកឧត្តម Partrick Murphy បានជូនពរសារជាថ្មី ជូនដល់លោកជំទាវ រដ្ឋមន្រី្ត ក៏ដូចជាសហការីទាំងអស់ ដែលបានចូលរួមប្រជុំនាព្រឹកនេះ និងសូមសម្តែងការអបអរសាទរចំពោះព្រះរាជាណាចក្រកម្ពុជា ដែលបានរៀបចំកម្មវិធីដ៏ល្អ ជាពិសេសកម្មវិធី​អង្គរសង្រ្កាន្តនៅខេត្តសៀមរាប។ ជាដំបូងឯកឧត្តម ឯកអគ្គរដ្ឋទូត ក៏បានសម្តែងការពេញចិត្​តចំពោះ​កិច្ចសហប្រតិបតិ្តការ​លើវិស័យវប្បធម៌ រវាងកម្ពុជា-អាមេរិក លើកិច្ចការបេតិកភណ្ឌរូបី និងបេតិកភណ្ឌអរូបី។ ជាក់ស្តែងភាគីអាមេរិក បានជួយជួសជុលអភិរក្សប្រាសាទបុរាណនៅតំបន់អង្គរ ខេត្តសៀមរាប និង​អភិរក្សប្រាសាទ​បុរាណនៅតំបន់ប្រាសាទព្រះវិហារ ខេត្តព្រះវិហារ និងកិច្ចការងារផ្សេងៗទៀត ក្នុងការចូលរួមជួយក្នុង​ក្របខ័ណ្ឌរដ្ឋាភិបាល និងក្នុងក្របខ័ណ្ឌNGO ដែលបានជួយលើការងារផ្សេងៗ ជារួមកិច្ចសហការរវាងកម្ពុជា និង​សហរដ្ឋអាមេរិក លើវិស័យវប្បធម៌មានភាពរឹងមាំ និងរីកចម្រើន គួឱ្យកត់សម្គាល់។ លើសពីនេះ កម្ពុជា-អាមេរិក មានអនុស្សរណៈនៃការយោគយល់គ្នារវាងរដ្ឋាភិបាលសហរដ្ឋអាមេរិក និងរាជរដ្ឋាភិបាលកម្ពុជា ស្តីពី «ការដាក់កម្រិត ហាមប្រាមនូវការនាំចូលប្រភេទ វត្ថុបុរាណរបស់ប្រទេសកម្ពុជា» សម្រាប់រយៈពេល ០៥ឆ្នាំ ដែលនឹងត្រូវផុតកំណត់នៅអំឡុងខែកញ្ញា ឆ្នាំ២០២៣ខាងមុខនេះ។ ហើយផ្តើមចេញពីអនុស្សារណៈខាងលើនេះ យើងបានធ្វើកិច្ចការងារជាច្រើន និងឃើញមានវត្ថុបុរាណច្រើន ដែលគេលួចពីកម្ពុជា អំឡុងពេលសង្រ្គាម ហើយក៏បានត្រឡប់មកកាន់ប្រទេសកម្ពុជាវិញ គឺដោយសារកម្ពុជា មានកិច្ចសហប្រតិបតិ្តការជាមួយអាមេរិក តាមរយៈអនុស្សារណៈនេះ ក៏នឹងជួយដល់កម្ពុជា ក្នុងការប្រមែប្រមូលនូវវត្ថុបុរាណដែលត្រូវ​បានគេលួចទៅកាន់​បរទេសនោះ ត្រឡប់មកកម្ពុជាវិញផងដែរ។

ក្នុងជំនួបដដែលនេះលោកជំទាវ បណ្ឌិតសភាចារ្យ ភឿង សកុណា និងឯកឧត្តម W. Partrick Murphy មាន​សុទិដ្ឋិនិយម​ក្នុង​ការបន្តសុពលភាពឡើងវិញលើអនុស្សរណៈនៃការយោគយល់គ្នារវាងរដ្ឋាភិបាលសហរដ្ឋអាមេរិក និងរាជរដ្ឋាភិបាលកម្ពុជាស្តីពី «ការដាក់កម្រិត ហាមប្រាមនូវការនាំចូលប្រភេទ វត្ថុបុរាណរបស់ប្រទេសកម្ពុជា» សម្រាប់រយៈពេល ០៥ឆ្នាំ ២០២៣-២០២៨ នាពេលខាងមុខ។

សូមបញ្ជាក់ផងដែរថា នៅឆ្នាំ២០២២ រហូតដល់បច្ចុប្បន្ន សហរដ្ឋអាមេរិកបានប្រគល់វត្ថុសិល្បៈបុរាណខ្មែរ ដើម្បីយក​មករក្សាទុកនៅសារមន្ទីរជាតិ មានចំនួន ៤៣ វត្ថុបុរាណ៕ អត្ថបទ៖ រដ្ឋា