ភ្នំពេញ៖ កម្ពុជាបច្ចុប្បន្ននេះ គឺត្រូវការសាលារៀនអប់រំពិសេសបន្ថែមទៀត សម្រាប់កុមារមាន​បញ្ហា​អូទីស្សឹម។ នៅជាការលើកឡើងរបស់ប្រធានបណ្ដាញអូទីស្សឹមកម្ពុជា ក្នុងឱកាសប្រារព្ធទិវា​អូទីស្សឹម និងដោនស៊ីនដ្រូម។

លោក ចាន់ សារិន ប្រធានបណ្ដាញអូទីស្សឹមកម្ពុជា និងជានាយកវិទ្យាល័យអប់រំពិសេសក្រុងតាខ្មៅ លើកឡើងក្នុងទិវាអូទីស្សឹម និងដោនស៊ីនដ្រូមថា ​កម្ពុជាបច្ចុប្បន្នត្រូវការ សាលារៀនអប់រំពិសេស​បន្ថែមទៀត​ ពិសេសសម្រាប់កុមារមានបញ្ហាអូទីស្សឹម ខណៈបច្ចុប្បន្នគឺមានកុមារអូទីស្សឹមរហូត​ដល់ជាង ២០០នាក់ កំពុងរង់ចាំចូលរៀននៅវិទ្យាល័យអប់រំពិសេសក្រុងតាខ្មៅ។

ការរង់ចាំនេះ ​គឺដោយសារសាលាខ្វះបន្ទប់សិក្សា​ ក៏ដូចជាខ្វះគ្រូមានវិជ្ជាជីវៈជំនាញ សម្រាប់​កុមារអូទីស្សឹម។ ទន្ទឹមនឹងមានកុមារកំពុងរង់ចាំ ​ក៏មានកុមារអូទីស្សឹមជាង ២០០នាក់កំពុងសិក្សានៅ វិទ្យាល័យអប់រំពិសេសក្រុងតាខ្មៅផងដែរ។

តាមបទពិសោធន៍ធ្វើការជាមួយកុមារអូទីស្សឹមជាច្រើនឆ្នាំមកនេះ លោក ចាន់ សារិន បានណែនាំ​ឱ្យ​អាណាព្យាបាល ​តាមដានស្ថានភាពកូន ​និងត្រូវទៅពិគ្រោះជាមួយគ្រូពេទ្យជំនាញ ក្នុងករណី​សង្ស័យ​មានបញ្ហាអូទីស្សឹម។ លោក បន្តថា ករណីវេជ្ជបណ្ឌិតបញ្ជាក់ថា ពិតជា​មានអូទីស្សឹម គឺត្រូវ​បញ្ជូនកុមារទៅសិក្សានៅសាលាអប់រំពិសេស​ជាបន្ទាន់ ដើម្បីបង្រៀន​កុមារឱ្យមានភាពប្រសើរ។

ក្នុងឱកាសរៀបចំទិវាអូទីស្សឹមនេះឯកឧត្តម ឯម ច័ន្ទមករា ​រដ្ឋលេខាធិការក្រសួងសង្គមកិច្ច ក៏បាន​លើកឡើងពីបញ្ហាប្រឈមមួយចំនួន​ ដែលកើតឡើងចំពោះកុមារ ​អូទីស្សឹមផងដែរ។

ឯកឧត្តមបញ្ជាក់ថា បញ្ហាប្រឈមសំខាន់មួយ គឺជាការរៀបចំសាលារៀនដែលមានស្តង់ដារត្រឹមត្រូវ សម្ភារ ​សម្រាប់សិស្សអូទីស្សឹម ដោនស៊ីនដ្រូម និងខ្សោយសតិបញ្ញា ​នៅតាមរាជធានីខេត្ត។

បច្ចុប្បន្ននេះ​ កម្ពុជាមានវិទ្យាល័យអប់រំពិសេសក្រុងតាខ្មៅ ​កំពុងបង្រៀនដល់ ​កុមារមានអូទីស្សឹម និងដោនស៊ីនដ្រូម។ ​ក្រៅពីនេះគឺមានសាលាអង្គការមួយចំនួន ​ដែលបង្រៀនកុមារ​ អូទីស្សឹម តែពុំមាន​ច្រើននោះទេ។ នេះជាការបញ្ជាក់របស់ ​លោក ចាន់ សារិន ជាប្រធានបណ្ដាញ​អូទីស្សឹម​កម្ពុជា និងជានាយកវិទ្យាល័យអប់រំពិសេសក្រុងតាខ្មៅ៕អត្ថបទ៖ គឹមហុក