ទិន្នន័យពីមន្ទីរស្ថិតិជាតិ(NBS)បានបង្ហាញកាលពីថ្ងៃអង្គារថា ផលិតផលក្នុងស្រុកសរុប(GDP) របស់ចិន បានកើនឡើង ៤,៥ភាគរយនៅត្រីមាសដំបូងក្នុងឆ្នាំ ២០២៣ ស្របពេលដែលសកម្មភាពសេដ្ឋកិច្ច មានភាពជោគជ័យតិតតួចឡើងវិញ ។  

លោក Pang Ming គឺជាប្រធានសេដ្ឋវិទូ និងជាប្រធានក្រុមស្រាវជ្រាវនៅក្រុមហ៊ុន JLL Greater China និយាយថា ពួកយើងមើលឃើញការងើបសេដ្ឋកិច្ចឡើងវិញលឿន នៅគ្រប់វិស័យទាំងអស់ ដោយមានសន្ទុះខ្លាំងជាងមុន រួមទាំងតម្រូវការក្នុងស្រុកកើនឡើងផងដែរ ។  

អត្រាកំណើនសេដ្ឋកិច្ចនេះដែរ ខ្ពស់ជាងការរំពឹងទុករបស់ក្រុមអ្នកវិភាគថាមានចំនួន ៤ភាគរយ អំឡុងការស្ទង់មតិរបស់ទីភ្នាកងារព័ត៌មានរ៉យទ័រ ។  

លោក Fu Linghui គឺជាអ្នកនាំពាក្យរបស់ NBS និយាយថា ការរំពឹងទុកទីផ្សារ កើនឡើងច្រើនគួរឲ្យកត់សំគាល់ ចាប់តាំងពីដើមឆ្នាំ។ លោកបន្តថា អត្រាកំណើនសេដ្ឋកិច្ចនៅត្រីមាសទី២ ត្រូវបានគេរំពឹងទុកថានឹងកើនឡើងច្រើនផងដែរ បើប្រៀបធៀបនឹងត្រីមាសដំបូង ដោយសារតែមូលដ្ឋានប្រៀបធៀបទាបអំឡុងពេលតែមួយកាលពីឆ្នាំមុន។  

ចាប់ពីពេលឥឡូវនេះតទៅ លោក Pang បានក្រើនរំឭកថា ការគាំទ្រគោលនយោបាយ នៅតែត្រូវការដើម្បីធានាដល់កំណើនសេដ្ឋកិច្ចប្រកបដោយនិរន្តរន៍ភាព ស្របពេលមានភាពមិនប្រាកដប្រជាខាងក្រៅ។  

ដោយឡែក លោក Cheng Shi គឺជាប្រធានសេដ្ឋកិច្ចវិទូនៅក្រុមហ៊ុន ICBC International និយាយថា គោលនយោបាយម៉ាក្រូសេដ្ឋកិច្ចរបស់ចិន គួរតែរក្សាកំណើនតម្រូវការក្នុងស្រុកជាអាទិភាព ដោយសារតែម្រូវការខាងក្រៅទន់ខ្យោយ។  

នៅត្រីមាសដំបូង ការលក់រាយសរុបទំនិញអ្នកប្រើប្រាស់កើនឡើង ៥,៨ភាគរយ រយៈពេលពីមួយឆ្នាំទៅមួយឆ្នាំ ។ អ្វីដែលគួរឲ្យចាប់អារម្មណ៍គឺនៅខែមីនា ការចំណាយរបស់អ្នកប្រើប្រាស់ ហក់ឡើងខ្ពស់ដល់ ១០,៦ភាគរយ រយៈពេលពីមួយឆ្នាំទៅមួយឆ្នាំ ពោលគឺមានពិន្ទុ ៧,១ ភាគរយខ្ពស់ជាង ២ខែដំបូងក្នុងឆ្នាំ ២០២៣៕