ក្រុមនគរបាលនៅអាមេរិកឡាទីន រឹបអូសបានសារធាតុកូកាអ៊ីន និងគ្រឿងញៀនផ្សេងៗជាច្រើនប្រភេទទៀត ដែលមានតម្លៃ ៥ពាន់លានដុល្លារ អំឡុងប្រតិប្តិការរយៈពេល ៣សប្តាហ៍ របស់ពួកគេនៅតាមបណ្តាប្រទេសចំនួន១៥។ ពួកគេរឹបអូសបានផងដែរអាវុធខុសច្បាប់ជាង ៨ពាន់ដើម និងបានចាប់ខ្លួនឧក្រិដ្ឋជនគ្រឿងញៀនយ៉ាងហោច ១៥.០០០នាក់។  

ក្រុមនគរបាលមកពីប្រទេសម៉ិសស៊ិក នៅភាគខាងជើងអាមេរិកឡាទីន រហូតដល់ប្រទេសអាហ្សង់ទីន នៅភាគខាងត្បូងអាមេរិកឡាទីន បានផ្លាស់ប្តូរព័ត៌មាននៅក្នុងប្រតិបត្តិការនេះ ដែលត្រូវបានសម្របសម្រួលដោយអង្គភាពនគរបាលឧក្រិដ្ឋកម្មអន្តរជាតិ Interpol។  

Interpol និយាយថា ការចាប់ខ្លួនឧក្រិដ្ឋជនគ្រឿងញៀន បានបង្អាក់ការងាររបស់ក្រុមអន្ធពាលដ៏មានឥទ្ធិពលជាច្រើន ។  

ប្រតិបត្តិការបង្រ្កាបគ្រឿងញៀន Trigger IX គឺជាកិច្ចខិតខំប្រឹងប្រែងអន្តរជាតិមានគោលដៅសំខាន់លើការប្រយុទ្ធប្រឆាំងនឹងការរត់ពន្ធអាវុធខុសច្បាប់ ។ ក្រុមអ្នកជំនាញមកពីបណ្តាប្រទេសចូលរួម បានជួបជុំគ្នានៅមជ្ឈមណ្ឌលប្រតិបត្តិការ ស្ថិតក្នុងទីក្រុង Foz do Iguaçu គឺជាទីក្រុងជាប់ព្រំដែនរវាងប្រទេសប្រេស៊ីល ជាមួយអាហ្សង់ទីន និងប៉ារ៉ាហ្គាយ ចាប់ពីថ្ងៃទី ១២ ខែមីនា ដល់ថ្ងៃទី ២ ខែមេសា។  

នៅទីនោះ ពួកគេបានផ្លាស់ប្តូរព័ត៌មានចារកម្មលើការងាររបស់ក្រុមឧក្រិដ្ឋកម្មគ្រឿងញៀន ដូចជាក្រុម First Capital Command (PCC)និងក្រុម Mara Salvatrucha ដោយពួកគេមានគោលដៅបង្អាក់លំហូរអាវុធខុសច្បាប់។ Interpol បានព្រមានជាយូរមកហើយថា ការរត់ពន្ធអាវុធខុសច្បាប់ នឹងពង្រឹងកម្លាំងក្រុមឧក្រិដ្ឋកម្មគ្រឿងញៀន និងបង្កឲ្យកើតមានសកម្មភាពឧក្រិដ្ឋកម្មរបស់ពួកគេបន្ថែមទៀត៕