​បាល់ទាត់៖ ​ជោគវាសនា​របស់​ក្រុមអង់គ្លេស Manchester City ថា​អាច​ឡើង​វគ្គ​ផ្ដាច់ព្រ័ត្រ UEFA Champions League លើកដំបូង​ក្នុង​រយៈពេល ៥១​ឆ្នាំ​បាន​ រឺ​អត់​ត្រូវ​រង់ចាំ​យប់​នេះ​នៅ​ពេល​ទទួល​ភ្ញៀវ​ជើងឯក​បារាំង Paris Saint Germain ជើង​ទី២​។

​​បន្ទាប់ពី​នាំមុខ ២-១ ក្នុង​ជ័យជំនះ​នៅ​ទឹកដី​បារាំង Manchester City អ្នកចាត់ការ Pep Guardiola បាន​និយាយ​ថា មិន​ដែល​មាន​ពាក្យ​ថា​ងាយស្រួល​ឡើយ​ក្នុង​ជើង​ទី២ នៅ UCL មិន​អ្នក​នាំមុខ​ប៉ុន្មាន​គ្រាប់​ក៏ដោយ ក្រុម​របស់លោក​ត្រូវតែ​លេង​ដោយ​មិន​គិតថា​ មានរឿង​អ្វី​កើតឡើង​កាលពី​ជើង​ទី១ ទោះ​ចំណេញ​គ្រាប់​បាល់ ១គ្រាប់​ក៏ដោយ​។ ​Manchester City មិនមាន​បញ្ហា​របួស​អ្វី​ធំដុំ​ឡើយ បន្ទាប់ពី​លោក Pep Guardiola បាន​ទុកឲ្យ​កីឡាករ​សំខាន់ៗ​សម្រាក​ក្នុង​ជ័យជំនះ​កាលពី​ថ្ងៃ​សៅរ៍​លើ Crystal Palace ២-០ ដូចជា Ilkay Gundogan, Kevin de Bruyne, RiyadMahrez, Bernardo Silva, Kyle Walker, Ruben Dias និង Phil Foden ​ជាដើម​។

​​ងាក​មក Paris Saint Germain​ ដែល​ត្រូវការ​គ្រាប់​បាល់​ជា​ចាំបាច់​លើសពី ១គ្រាប់​កំពុងមាន​ការបារម្ភ​ថា​ខ្សែប្រយុទ្ធ Kylian Mbappe ​អាច​ចូល​លេង​បាន​រឺ​អត់ បន្ទាប់ពី​អវត្តមាន​កាលពី​ថ្ងៃ​សៅរ៍​នៅពេល PSG យកឈ្នះ RC Lens ដោយសារ​បញ្ហា​កំភួនជើង​។ ​Kylian Mbappe​ នៅ​ពេលនេះ​រកបាន ៣៧គ្រាប់​ក្នុងការ​បង្ហាញខ្លួន ៤៣ប្រកួត​រដូវ​កាល​នេះ​ដែល​ក្នុងនោះ​មាន ៨ គ្រាប់​ក្នុងការ​បង្ហាញខ្លួន ១០ប្រកួត​នៅ Champions League​។​ ​រំលឹកថា ​ក្នុង​ប្រវត្តិសាស្ត្រ​ក្លិប​បារាំង​មិនដែល​ឡើង​វគ្គ​បន្ត​ឡើយ ​នៅ​ពេល​ចាញ់​ជើង​ទី១ ក្នុង​ទឹកដី​ខ្លួនឯង​។ ​Manchester City បើ​ឆ្លង​ផុតពី PSG យប់​នេះ​ពួកគេ​នឹង​ឡើង​វគ្គ​ផ្តាច់ព្រ័ត្រ​ទ្វីបអឺរ៉ុប​ លើកដំបូង​ក្នុង​រយៈពេល ៥១ឆ្នាំ​តាំងពី​ឈ្នះ​ជើងឯក Cup Winner Cup ចុងក្រោយ​បំផុត​នៅ​ឆ្នាំ១៩៧០៕

​អត្ថបទ​៖​នាង សុភា​វុ​ធ