កូនក្មេងតូច បានលបលូនចូលបរិវេណសេតវិមានកាលពីថ្ងៃអង្គារ ជាហេតុធ្វើឲ្យមានការឆ្លើយតបរហ័សពីសេវាកម្មសម្ងាត់សហរដ្ឋអាមេរិក ។ 

លោក Anthony Guglielmi គឺជាប្រធានផ្នែកទំនាក់ទំនងសេវាកម្មសម្ងាត់ បាននិយាយថា កូនក្មេងតូចម្នាក់ បានលូនឆ្លងតាមរបងខាងជើងសេតវិមាន ធ្វើឲ្យមានការប្រកាសអាសន្នពីសន្តិសុខ។ 

 លោក Gugliemli បន្តថា នៅថ្ងៃនេះ កងពលឯកសណ្ឋានសេវាកម្មសម្ងាត់ បានជួបប្រទះភ្ញៀវវ័យក្មេងដ៏ចម្លែកម្នាក់នៅតាមរបងខាងជើងសេតវិមាន ដែលបានលូនចូលបរិវេណសេតវិមានមួយភ្លែត។ ភ្លាមៗនោះ ប្រព័ន្ធសន្តិសុខសេតវិមាន បានឆ្លើយតបទៅកាន់ក្រុមមម្រ្តីសេវាកម្មសម្ងាត់ ហើយកូនក្មេងតូចម្នាក់នោះ និងឪពុកម្តាយរបស់គេក៏បានជួបគ្នាវិញភ្លាមៗផងដែរ។ 

គួរឲ្យដឹងថា វាមិនមែនជាលើកដំបូងនោះទេដែលកូនក្មេងតូច បានលូនឆ្លងកាត់របងសេតវិមាន។ មាននូវឧបទ្ទេវហេតុស្រដៀងគ្នានេះផងដែរនៅឆ្នាំ ២០១៤ ពេលដែលកូនក្មេងតូចម្នាក់វារឆ្លងកាត់របងសេតវិមាន មុនពេលដែលអតីតប្រធានាធិបតី Barack Obama គ្រោងនឹងថ្លែងសុន្ទរកថាជាតិស្តីពីបញ្ហាអ៊ីរ៉ាក់។ ការបំពាននេះ បង្ខំឲ្យបិទសេតវិមានបណ្តោះអាសន្ន និងពន្យាពេលការថ្លែងទៅកាន់សារព័ត៌មាន។ 

លោក Edwin Donovan គឺជាអ្នកនាំពាក្យសេវាកម្មសម្ងាត់សហរដ្ឋអាមេរិក និយាយថា ពួកយើងត្រូវរង់ចាំរហូតដល់ក្មេងតូចម្នាក់នេះចេះនិយាយដើម្បីសួរគេ តែផ្ទុយទៅវិញក្មេងតូចម្នាក់នេះ ត្រូវសម្រាក ហើយពួកយើងក៏ប្រគល់ជូនឪពុកម្តាយរបស់គេវិញ ៕