សិល្បការិនីកាយសម្ព័ន្ធចិនម្នាក់ បានធ្លាក់ស្លាប់ អំឡុងពេលសម្តែងតោងកំណាត់ខ្សែសូត្រលើអាកាសជាមួយស្វាមីរបស់នាង ជាហេតុធ្វើឲ្យមានការភ័យរន្ធត់ជាខ្លាំង និងការស្រែកបញ្ចេញកំហឹងនៅតាមបណ្តាញព័ត៌មានសង្គម ចំពោះកង្វះខាតវិធានការសុវត្ថិភាព។ 

នារីម្នាក់មានត្រកូលឈ្មោះ Sun បានធ្លាក់លើឆាក អំឡុងពេលសម្តែងតាមទម្លាប់នៅពាក់កណ្តាលអាកាសកាលពីថ្ងៃសៅរ៍ជាមួយស្វាមីរបស់នាង នៅក្នុងភូមិមួយកន្លែង ស្ថិតនៅជិតទីក្រុង Suzhou ក្នុងខេត្តភាគកណ្តាល Anhui។ 

 រដ្ឋបាលស្រុក Tongqiao និយាយនៅក្នុងសេចក្តីថ្លែងការណ៍ថា នាងត្រូវបានបញ្ជូនទៅកាន់មន្ទីរពេទ្យ ប៉ុន្តែនាងបានស្លាប់ដោយសារតែរបួសធ្ងន់ធ្ងរពេក ។ 

រូបភាពវីដេអូឃ្លីបនៅលើអនឡាញ ឃើញគូស្វាមី-ភរិយា ត្រូវបានទាញឡើងយ៉ាងខ្ពស់ទៅលើអាកាស ដោយដងស្ទួច ពីលើឆាកកណ្តាលវាលដ៏ធំ ដោយនារីម្នាក់នោះតោងស្វាមីរបស់នាង ដែលដៃរបស់គាត់រុំខ្សៃពីរកំណាត់ដែលចងព្យួរនឹងដងស្ទួច។ 

 វីដេអូឃ្លីបនេះ បង្ហាញថា ពេលដែលពួកគេយោលនៅពាក់កណ្តាលអាកាស នារីម្នាក់នេះ បានរុំដៃរបស់នាងជុំវិញក្បាលប្តីរបស់នាង និងតោងគាត់ អំឡុងពេលសម្តែងប្តូរវេនគ្នា ។ ប៉ុន្តែនាងបានភ្លាត់ចំណាប់តោងដោយខ្លួនឯង និងធ្លាក់លើឆាក ធ្វើឲ្យមានការស្រែកយ៉ាងខ្លាំងពីក្រុមទស្សនិកជន ។ ស្វាមីរបស់នាង ព្យាយាមចាប់នាងដោយប្រើជើងរបស់គាត់ដែរ ប៉ុន្តែនៅតែមិនអាចជួយនាងបាន។ 

វីដេអូដ៏គួររន្ធត់នេះ បានធ្វើឲ្យសារព័ត៌មានសង្គមចិនភ្ញាក់ផ្អើលយ៉ាងខ្លាំង ។ អ្នកប្រើប្រាស់ជាច្រើន បានចោទសួរថាតើហេតុអ្វីបានជានារីម្នាក់នេះ ពុំពាក់ខ្សែក្រវាត់សុវត្ថិភាព ហើយហេតុអ្វីបានជាគ្មានសំណាញ់សុវត្ថិភាព ឬពួកធ្លាក់នៅលើដី៕