ទីភ្នាក់ងារមនុស្សធម៌អង្គការសហប្រជាជាតិ(UN) បានធ្វើការព្រមានកាលពីថ្ងៃអង្គារថា ប្រជាពលរដ្ឋ ៤៨លាននាក់ នៅអាហ្វ្រិកខាងលិច និងអាហ្វ្រិកកណ្តាល ប្រឈមនឹងអសន្តិសុខស្បៀងធ្ងន់ធ្ងរក្នុងរយៈពេលប៉ុន្មានខែខាងមុខនេះ ដែលជាអត្រាកម្រិតខ្ពស់ក្នុងរយៈពេល ១០ឆ្នាំ ដោយសារតែបញ្ហាអសន្តិសុខ បញ្ហាបម្រែបម្រួលអាកាសធាតុ ការរីករាលដាលឆ្លងសកលជំងឺ COVID-19 និងតម្លៃទំនិញហក់ឡើងខ្ពស់។ 

លោក Ollo Sib គឺជាទីប្រឹក្សាស្រាវជ្រាវ វាយតម្លៃ និងតាមដានស្ថានភាពនៅអាហ្វ្រិកខាងលិចរបស់កម្មវិធីស្បៀងអាហារពិភពលោក និយាយថា អាហ្វ្រិកខាងលិច និងអាហ្វ្រិកកណ្តាល បានប្រឈមហានិភ័យកើនឡើងបណ្តាលមកពីសីតុណ្ហភាពខ្ពស់ជាងមុន និងភ្លៀងធ្លាក់មិនទៀងទាត់ ។ ចំណែកឯសង្រ្គាមនៅអ៊ុយក្រែន បានរួមចំណែកធ្វើឲ្យមានកើតមានកង្វះខាតស្បៀងអាហារ និងជីកសិកម្ម នៅតំបន់ក្រីក្របំផុតរបស់ពិភពលោកមួយនេះ។ ទំនិញ ២១លានតោន ដែលពួកយើងត្រូវតែនាំចេញពីទីផ្សារជាតិ នឹងរងផលប៉ះពាល់ដោយសារកត្តា ២៖ ទី១ ការឡើងតម្លៃដឹកជញ្ជូន និងទី២ ការឡើងតម្លៃប្រេង ។  

លោកបន្តថា ការកើនឡើងតម្លៃដឹកជញ្ជូន និងតម្លៃប្រេង ហើយនិងការកើនឡើងតម្លៃទាំងអស់ នឹងធ្វើឲ្យកើនឡើងតម្លៃនាំចូលទំនិញសម្រាប់តំបន់របស់ពួកយើង។  

យោងតាមការវិភាគសន្តិសុខស្បៀងក្នុងតំបន់តំណាងឲ្យកម្មវិធីស្បៀងអាហារពិភពលោករបស់ UN ទីភ្នាក់ងារមនុស្សធម៌ OCHA អង្គការស្បៀងនិងកសិកម្ម ទីភ្នាក់ងារកុមារ UNICEF បានឲ្យដឹងថា ចំនួនប្រជាពលរដ្ឋដែលពុំទទួលបានស្បៀអាហារសុវត្ថិភាព និងចំណីអាហារមានជីវជាតិ ត្រូវបានគេព្យាករណ៍ថាមានចំនួន ៤៨លាននាក់ អំឡុងរដូវធ្វើកសិផលចាប់ពីខែមិថុនាដល់ខែសីហាខាងមុខនេះ ៕