ភ្នំពេញ ៖ ក្លឹបអ្នកកាសែតកម្ពុជាដែលហៅកាត់ថា ក.អ.ក នឹងរៀបចំវេទិកាមួយ ដើម្បី«ពង្រឹងក្រមសីលធម៌​នៃវិជ្ជាជីវៈ​សារព័ត៌មាន ខណៈវេទិកានេះនឹងប្រព្រឹត្តិទៅនៅថ្ងៃទី២១ ខែមេសា ឆ្នាំ២០២៣នេះ នៅវិទ្យាស្ថានជាតិអប់រំ​ក្បែរវិមាន​ឯករាជ្យ ហើយនឹងមាន​សមាជិកចូលរួមជាងប្រាំរយនាក់។

 យោងតាមសេចក្តីប្រកាសព័ត៌មានរបស់ក្លឹបអ្នកកាសែតកម្ពុជា(ក.អ.ក) បានបញ្ជាក់ថា វេទិកានេះ គឺធ្វើឡើងដើម្បី​ផ្សព្វផ្សាយ​ក្រម​សីលធម៌​នៃវិជ្ជាជីវៈសារព័ត៌មានរបស់ខ្លួន ហើយការផ្តួចផ្តើមគំនិតក្នុង ការជួបជុំគ្នានេះដែរ ក៏ដើម្បីអបអរសាទរ​ទិវា​សេរីភាព​​សារព័ត៌មាន​​ពិភពលោក ៣ឧសភាផងដែរ។

លោកពុយ គា ប្រធានក្លឹបអ្នកកាសែតកម្ពុជាបានថ្លែងតាមរយៈសេចក្តីប្រកាសព័ត៌មាន​នេះថា«នេះជាវេទិកាដ៏ធំ​មួយនៅក្នុងប្រវត្តិនៃវិស័យសារព័ត៌មាន ដែលបើកឲ្យមានការពិភាក្សាវែកញែកអំ ពីក្រមសីលធម៌វិជ្ជាជីវៈសារព័ត៌មាន ដែលជាប្រធានបទដ៏ក្តៅនៅក្នុងយុគសម័យឌីជីថល»។

 ជាមួយនឹងការរៀបចំនៃវេទិកានាពេលខាងមុខនេះ លោកពុយ គា ក៏បានរំពឹងផងដែរថា វេទិកានេះ នឹងជួយពង្រឹង​សមត្ថភាព​អ្នក​សារព័ត៌មានឲ្យកាន់តែប្រសើរ ជាពិសេសក្រមសីលធម៌ និងវិជ្ជាជីវៈនេះតែម្តងដែល​ជាខែលការពារ​អ្នកសារព័ត៌មានពីការរិះគន់ និងប្តឹងផ្តល់ជាដើម។

 សូមបញ្ជាក់ថា វេទិកាខាងលើនេះ នឹងត្រូវបែងចែកជាបីវគ្គ គឺវគ្គទី១៖ ចាប់ផ្តើមពីម៉ោង២រសៀល ដល់៥ល្ងាច គឺជាវគ្គពិភាក្សាដេញដោល និងចែករំលែកពិសោធន៍ព្រមទាំងចំណេះដឹងស្តីពី ការអនុវត្តវិជ្ជាជីវៈ និងក្រមសីលធម៌អ្នក​សារព័ត៌មាន។ នៅក្នុងវគ្គទី១នេះ លោកពុយ គា នឹងធ្វើបទបង្ហាញនូវអត្ថបទក្រម សីលធម៌របស់ក្លឹបអ្នកកាសែត​ដល់សមាជិកទាំងអស់ផងដែរ ហើយខណៈវគ្គទី១នេះដែរ ក៏នឹងមានវត្តមាន អ្នកកាសែតជើងចាស់ ដែលពិសោធន៍យូ​រ​ឆ្នាំ​របស់កម្ពុជា និងបរទេសដូចជាមកពីប្រទេសអូស្ត្រាលី បារាំង អាល្លីម៉ង់ និងថៃ ចំនួន១០ចាំឆ្លើយនឹងសំណួរ និងចែករំលែកបទពិសោធន៍របស់ពួកគេផងដែរ។

វគ្គទី២៖ចាប់ពីម៉ោង៥ដល់ម៉ោង៦ល្ងាច គឺជាវេទិកាសំណេះសំណាលរបស់ឯកឧត្តម ខៀវ កាញារិទ្ឋ រដ្ឋមន្ត្រី​ក្រសួងព័ត៌មាន​​ជា​សមាជិកក្លឹបអ្នកកាសែតកម្ពុជា។ និងវគ្គទី៣៖ ជាពិធីបរិភោគអាហារសាមគ្គី ដែលភ្ជាប់មកជាមួយ​នឹងការចាប់រវង្វាន់ជាច្រើនដែលឧបត្ថម្ភដោយវិស័យឯកជន សប្បុរសជនដែលគាំទ្រ និងលើកស្ទួយវិស័យសារព័ត៌មាន​កម្ពុជាផងដែរ៕ ដោយ ៖ បាន ចក់