ក្រសួងពាណិជ្ជកម្មអាមេរិកបាននិយាយកាលពីថ្ងៃពុធថា ក្រុមហ៊ុនបច្ចេកវិទ្យា Seagate Technology Holdings PLC STX.O បានព្រមព្រៀងបង់ប្រាក់ផាកពិន័យចំនួន៣០០លានដុល្លារអាមេរិក ក្នុងការដោះស្រាយជាមួយក្រុមអាជ្ញាធរសហរដ្ឋអាមេរិក ចំពោះការផ្ដល់ hard disk ដែលមានតម្លៃជាង១.១ពាន់លានដុល្លារអាមេរិកទៅឲ្យក្រុមហ៊ុនបច្ចេវិទ្យាខ្នាតយក្ស Huawei របស់ចិន ដែលបំពានទៅនឹងច្បាប់គ្រប់គ្រងការនាំចេញរបស់សហរដ្ឋអាមេរិក។

ក្រុមហ៊ុន Seagate បានលក់បន្ទះ hard disk drivesទៅឲ្យក្រុមហ៊ុន Huawei ចន្លោះខែសីហាឆ្នាំ២០២០ និងកញ្ញា ២០២១ ទោះបីជាមានច្បាប់ខែសីហាឆ្នាំ ២០២០ដែលដាក់កម្រិតលើការលក់របស់​របរបរទេសមួយចំនួនដែលផលិតដោយបច្ចេកវិទ្យារបស់សហរដ្ឋអាមេរិកដល់ក្រុមហ៊ុនក៏ដោយ។ ក្រុមហ៊ុន Huawei ត្រូវបានដាក់ក្នុងបញ្ជីឈ្មោះ Entity List ដែលជាបញ្ជីហាមប្រាមការធ្វើពាណិជ្ជកម្មរបស់សហរដ្ឋអាមេរិកក្នុងឆ្នាំ២០១៩ ដើម្បីកាត់បន្ថយការលក់ទំនិញរបស់សហរដ្ឋអាមេរិកឲ្យទៅក្រុមហ៊ុននេះស្របពេលមាន​ការព្រួយបារម្ភអំពីសន្តិសុខជាតិ និងគោលនយោបាយការបរទេស។

ការផាកពិន័យនេះ បង្ហាញពីសកម្មភាពចុងក្រោយធ្វើឡើងដោយទីក្រុងវ៉ាស៊ីនតោន​ដើម្បីទប់បច្ចេកវិទ្យាដ៏ទំនើបរបស់ចិនដែលអាចជួយដល់វ៏យយោធារបស់ខ្លួន លទ្ធភាពនៃការបំពានសិទ្ធិមនុស្ស ឬ គំរាមកំហែងដល់សន្តិសុខជាតិរបស់សហរដ្ឋអាមេរិក។

ក្រសួងពាណិជ្ជកម្មអាមេរិកបាននិយាយថា ក្រុមហ៊ុន Seagate បានផ្ដល់បន្ទះHard disk drives ចំនួន៧.៤ លានបន្ទះ ឲ្យទៅក្រុមហ៊ុន Huawei រយៈពេលប្រហែលមួយឆ្នាំ បន្ទាប់ពីច្បាប់ឆ្នាំ២០២០ បានចូលជាធរមាននិងបានក្លាយជាក្រុមហ៊ុនផ្គត់ផ្គង់ដ៏ធំផ្នែក hard drives របស់ក្រុមហ៊ុនយក្យ Huawei។ ក្រុមហ៊ុនទាំង២ពុំបានឆ្លើយតបទៅនឹងសំណើរសុំការអត្ថាធិប្បាយទេ៕