ប្រធានជំនួយរបស់អង្គការសហប្រជាជាតិ លោក Martin Griffiths បាននិយាយកាលពីថ្ងៃអង្គារថា បុគ្គលិកផ្តល់ជំនួយមនុស្សធម៌ និងសម្ភារៈនានា កំពុងបន្តក្លាយជាគោលដៅនៅក្នុងប្រទេសស៊ូដង់ ហើយអង្គការសហប្រជាជាតិកំពុងទទួល​បានរបាយការណ៍អំពីការវាយប្រហារ និងអំពើហិង្សារំលោភបំពានផ្លូវភេទលើបុគ្គលិកផ្តល់ជំនួយ។

លោក Griffith បានសរសេរបង្ហោះនៅលើបណ្តាញ Twitter ដោយនិយាយថា ការិយាល័យជំនួយ​របស់អង្គការសហប្រជាជាតិនៅតំបន់ដាហ្វួរខាងត្បូង ក៏ត្រូវបានគេចូលយករបស់ផ្សេងៗ​កាលពីថ្ងៃចន្ទ ។

លោក Griffith បានបង្ហោះនៅលើបណ្តាញ Twitter ថា «ទង្វើនេះពុំអាចទទួលយកបាន ហើយត្រូវតែបញ្ឈប់»។ អ្នកសារព័ត៌មានស៊ូដង់ខាងត្បូងម្នាក់ បាននិយាយកាលពីថ្ងៃពុធថា ប្រជាជនស៊ូដង់នឹងក្លាយជាអ្នកចាញ់ដ៏ធំបំផុតពីសង្គ្រាម ដែលមិនអាចមានអ្នកឈ្នះ ខណៈជម្លោះប្រដាប់អាវុធកំពុងតែបន្តរវាងក្រុមយោធាគូប្រជែងពីរក្រុមនៅក្នុងប្រទេសស៊ូដង់ បានធ្លាក់ចូលទៅក្នុងភាពវឹកវរបន្ថែមទៀត។

វិបត្តិនេះបានផ្ទុះឡើងកាលពីថ្ងៃសៅរ៍ បន្ទាប់ពីមានការមិនចុះសម្រុងគ្នាលើការដាក់បញ្ចូល​ក្រុម​យោធាប៉ារ៉ាដែលគេហៅថា កងកម្លាំងគាំទ្ររហ័ស (RSF) ចូលទៅក្នុងកងទ័ពជាតិរបស់​ប្រទេសស៊ូដង់ ជាផ្នែកមួយនៃការផ្លាស់ប្តូរឆ្ពោះទៅរកការគ្រប់គ្រងបែបជនស៊ីវិល។ យ៉ាងហោចណាស់មនុស្ស ២៧០ នាក់បានស្លាប់ និង ២,៦០០ នាក់បានរងរបួសនៅក្នុងជម្លោះនេះ។ ខណៈការប្រយុទ្ធបន្តអូសបន្លាយពេល ពលរដ្ឋនៅក្នុងរដ្ឋធានី Khartoum កំពុងប្រឈមមុខនឹងការលំបាកយ៉ាងខ្លាំងក្នុងការទទួលបានទឹក ថាមពលប្រើប្រាស់ និងការផ្គត់ផ្គង់ជាមូលដ្ឋាន។ មនុស្សជាច្រើនកំពុងមើលឃើញការឡើងថ្លៃម្ហូបអាហារនៅលើទីផ្សារដែលស្ទើរតែគ្មានអ្វី ខណៈអ្នកមួយចំនួនមិនហ៊ានចេញក្រៅទាល់តែសោះ ដោយសារ អំពើហិង្សានៅតែបន្តកើត​មាននៅតាមដងផ្លូវជុំវិញពួកគេ។