ប្រទេសឥណ្ឌា កំពុងស្ថិតក្នុងភាពតានតឹងនៃការផ្លាស់ប្តូរទីលំនៅដ៏ធំទៅកាន់ទីក្រុងនានា​របស់ប្រទេសនេះ ដែលជាការធ្វើចំណាកស្រុកពីទីជនបទទៅកាន់ទីក្រុងធំៗនានា ក្នុងប្រវត្តិសាស្ត្រមនុស្សជាតិ។

ការរំខានផ្នែកប្រជាសាស្រ្តនេះ កំពុងកើតមានឡើង ខណៈប្រទេសនេះ ត្រូវបានកំណត់ថានឹងកើន​លើស​ប្រទេសចិនដែលក្លាយជាប្រទេសមានប្រជាជនច្រើនជាងគេបំផុតនៅ​លើពិភពលោក​ជា​ផែនការរបស់អង្គការសហប្រជាជាតិ ដែលនឹងកើតឡើងនៅពាក់កណ្តាលឆ្នាំនេះ។

អ្នកជំនាញ និយាយថា ស្ថានភាពថ្មីរបស់ប្រទេសឥណ្ឌា បង្ហាញពីការបែងចែក​ប្រជាសាស្រ្តរបស់​ខ្លួនជាប្រទេសដែលមានចំនួនកម្មករវ័យក្មេងច្រើនជាងគេ ប៉ុន្តែក៏ជាបញ្ហាប្រឈមធំបំផុតរបស់​ប្រទេសផងដែរ ​ចំពោះការបង្កើតការងារគ្រប់គ្រាន់សម្រាប់ពួកគេ។ នោះហើយជាអ្វីដែលកំពុងជំរុញឱ្យមានការធ្វើចំណាកស្រុក ខណៈប្រជាជនពុំមានប្រាក់គ្រប់គ្រាន់​នៅក្នុងភូមិឋាន ដូច្នេះពួកគេកំពុងចាកចេញពីទីជនបទដោយមនុស្សរាប់លាននាក់ ត្រូវបានជំរុញ​ដោយក្តីសង្ឃឹម និងភាពអស់សង្ឃឹមក្នុងការស្វែងរកឱកាសកាន់តែប្រសើរនៅក្នុងទីក្រុងធំ។ នៅក្នុងមជ្ឈមណ្ឌលហិរញ្ញវត្ថុក្នុងទីក្រុង Mumbai របស់ប្រទេសឥណ្ឌា កាលពីពេលថ្មីៗនេះ ភាពច្របូកច្របល់របស់យុវជនវ័យក្មេងជាច្រើននាក់បានកើនឡើងជាបន្តបន្ទាប់ ខណៈនគរបាល​បានគ្រវី​ដំបងនិងអំពាវនាវឱ្យមានសណ្តាប់ធ្នាប់។ បេក្ខជនច្រើននាក់បានមកពីទូទាំងរដ្ឋដើម្បីស្វែងរកកន្លែងដែលចង់បានចូល​បម្រើការក្នុងកម្លាំង​នគរបាល។ ការប្រកួតប្រជែងមានភាពស្វិតស្វាញដែលមានបេក្ខជនចំនួន ៦៥ ម៉ឺននាក់ និងមានមុខតំណែងត្រឹមតែ ៨ ០០០ ប៉ុណ្ណោះ។ យោងតាមមជ្ឈមណ្ឌលសម្រាប់ការតាមដានសេដ្ឋកិច្ចឥណ្ឌា (CMIE) ជាស្ថាប័នឯករាជ្យ បាន​ឲ្យដឹងថា សេដ្ឋកិច្ចរបស់ប្រទេសនេះកំពុងរីកចម្រើនក្នុងល្បឿនយ៉ាងលឿន ដោយបង្កើតទីផ្សារដ៏​ធំមួយ​សម្រាប់ពិភពលោក។ ប៉ុន្តែអត្រាអ្នកអត់ការងារធ្វើរបស់ប្រទេសមានកម្រិតខ្ពស់ដល់ទៅ ៨% ។

ទិន្នន័យចេញផ្សាយកាលពីថ្ងៃពុធដោយអង្គការសហប្រជាជាតិបានបង្ហាញថា ប្រទេសឥណ្ឌា កំពុងត្រៀមកើនលើសចំនួនប្រជាជននៅប្រទេសចិន ជាប្រទេសមានប្រជាជនច្រើនជាងគេលើ​ពិភពលោក ដែលនឹងមានប្រជាជនលើសជិត ៣ លាននាក់ច្រើនជាងប្រទេសជិតខាងនៅ​ពាក់កណ្តាលឆ្នាំនេះ។