ក្រុមអ្នកទេសចរ និងអ្នកវិទ្យាសាស្ត្ររាប់ពាន់នាក់ ​បានសម្រុកទៅកាន់ទីក្រុងតូចមួយរបស់​ប្រទេសអូស្ត្រាលី ដែលផ្តល់នូវទីតាំងដ៏ល្អបំផុតមួយនៅលើភពផែនដីសម្រាប់មើល​សូរ្យគ្រាស​ដ៏កម្រ។

ផ្ទៃមេឃលើទីក្រុង Exmouth នៅភាគខាងលិចប្រទេសអូស្ត្រាលី នឹងប្រែទៅជាងងឹតក្នុងរយៈពេល​ប្រហែល ៦០ វិនាទីនៅថ្ងៃព្រហស្បតិ៍នេះ ​នៅពេលដែលព្រះចន្ទជះស្រមោលមាន​ទទឹង ៤០គីឡូម៉ែត្រនៅលើតំបន់នេះ។

សូរ្យគ្រាសទាំងមូលគឺជាផ្នែកមួយនៃសូរ្យគ្រាសកូនកាត់ដ៏កម្រ ដែលកើតឡើងតែពីរ ឬបីដងប៉ុណ្ណោះ​ក្នុងមួយសតវត្សរ៍។ សូរ្យគ្រាសមួយផ្នែក ក៏នឹងអាចមើលឃើញនៅទូទាំងតំបន់​ផ្សេងទៀតនៅអាស៊ីប៉ាស៊ីហ្វិក ។ សូរ្យគ្រាសនេះចាប់ផ្តើមនៅមហាសមុទ្រឥណ្ឌានៅពេលថ្ងៃរះ ហើយបញ្ចប់នៅពេលថ្ងៃលិចនៅមហា សមុទ្រប៉ាស៊ីហ្វិក ដោយមានអ្នកតាមសង្កេតមើលនៅ​ចំណុចផ្សេងៗគ្នាក្នុងគន្លងនៃសូរ្យគ្រាសដែលអាចឃើញដំណាក់កាលផ្សេងៗគ្នា ឬដំណាក់កាលកូនកាត់។ មនុស្សមួយចំនួននឹងឃើញសូរ្យគ្រាសទាំងមូល។

អ្នកផ្សេងទៀតនឹងមើលឃើញអ្វីដែលគេស្គាល់ថា ជាសូរ្យគ្រាសមានរាងមូល ដែលព្រះចន្ទមិនបាន​បិទបាំង​ព្រះអាទិត្យបានទាំងមូល​ ឬសូរ្យគ្រាសដោយផ្នែក។

ប្រជាជនរស់នៅក្នុងប្រទេសអូស្ត្រាលីភាគខាងលិច ប្រទេសទីម័រខាងកើត ​និងប៉ាពួខាងលិច នឹងមើលឃើញទិដ្ឋភាពល្អបំផុត។ ប៉ុន្តែមានតែអ្នកដែលនៅលើឧបទ្វីប Exmouth ប៉ុណ្ណោះដែល​នឹងជួបប្រទះសូរ្យគ្រាសទាំង​ មូលនៅម៉ោង ១១:២៧នាទីម៉ោងក្នុងតំបន់។

Exmouth ជាទីក្រុងទេសចរណ៍មួយមានចម្ងាយ១,២០០ គីឡូម៉ែត្រ ភាគខាងជើងទីក្រុង Perth ដែល ជាធម្មតាមានប្រជាជនតិចជាង ៣,០០០នាក់។

ប៉ុន្តែចំនួនប្រជាជនរបស់ទីក្រុងនេះបានកើនឡើង​ដល់ទៅ៧ដង ដោយមានអ្នកមកចូលរួម​ក្នុង​ទីក្រុង។ ខណៈព្រះចន្ទផ្លាស់ទីនៅចំពីមុខព្រះអាទិត្យ​ ហ្វូងមនុស្សដែលបានប្រមូលផ្តុំគ្នានឹងចូល​ក្នុង​ស្រមោលកោង បន្ទាប់មកគឺដល់ភាពងងឹត។ សីតុណ្ហភាពនឹងធ្លាក់ចុះ ផ្កាយនឹងលេចចេញមក ហើយ​សត្វព្រៃ នឹងចាប់ផ្តើមធ្វើសកម្មភាពប្លែកៗ។