មន្ត្រីច្បាប់បាននិយាយថា តុលាការកំពូលរបស់សហភាពមីយ៉ាន់ម៉ា កាលពីថ្ងៃពុធ បានយល់ព្រម ដើម្បីបើកសវនាការបណ្តឹងឧទ្ធរណ៍ចំពោះការកាត់ទោសលោកស្រី អ៊ុងសាន ស៊ូជី មេដឹកនាំដែលត្រូវបានបណ្តេញចេញ និងស្នើសុំកាត់បន្ថយការកាត់ទោសនៅក្នុងករណីជាច្រើន ដែលលោកស្រី ត្រូវបានចោទប្រកាន់ពីបទពុករលួយ ការក្លែងបន្លំក្នុងការបោះឆ្នោត និងរំលោភលើច្បាប់សម្ងាត់ផ្លូវការ។

លោកស្រី អ៊ុងសាន ស៊ូជី អាយុ ៧៧ ឆ្នាំ ត្រូវបានចាប់ខ្លួនកាលពីថ្ងៃទី១ ខែកុម្ភៈ ឆ្នាំ ២០២១ នៅពេលដែលយោធាបានដណ្តើមអំណាចពីរដ្ឋាភិបាលជាប់ឆ្នោតរបស់លោកស្រី។ លោកស្រីកំពុងកាត់ឲ្យជាប់ទោសដាក់ពន្ធនាគារសរុប ៣៣ឆ្នាំ បន្ទាប់ពីត្រូវបានរកឃើញថា មានទោស ក្នុងការកាត់ទោសដែលជំរុញដោយនយោបាយជាបន្តបន្ទាប់ ធ្វើឡើងដោយ របបយោធា។

អ្នកគាំទ្ររបស់លោកស្រី និងអ្នកជំនាញផ្នែកច្បាប់ឯករាជ្យនិយាយថា ករណីទាំងនេះគឺជា ការប៉ុនប៉ង​ដើម្បី​បង្ខូច​កេរ្តិ៍ឈ្មោះ​លោកស្រី និងធ្វើឱ្យស្របច្បាប់ការដណ្តើមចូលកាន់​អំណាច​របស់យោធា ខណៈបានរារាំងលោកស្រីមិនឲ្យត្រលប់ចូលកាន់ឆាកនយោបាយវិញ។ មន្ត្រីផ្នែកច្បាប់ដែលដឹងអំពីរឿងក្តីរបស់លោកស្រី អ៊ុងសាន ស៊ូជី បាននិយាយថា តុលាការកំពូល​មិនទាន់កំណត់​កាលបរិច្ឆេទ​បើក​សវនាការលើបណ្តឹងឧទ្ធរណ៍ និងសំណើសុំកាត់បន្ថយការកាត់​ទោសនេះទេ ​ប៉ុន្តែអាចនឹងធ្វើឡើងក្នុងរយៈពេលពីរខែខាងមុខ។

លោកស្រី អ៊ុងសាន ស៊ូជី ត្រូវបានកាត់ទោសលើបទចោទប្រកាន់ជាច្រើនករណី រួមទាំងការនាំចូល​ដោយ​ខុសច្បាប់ និង​កាន់កាប់​វិទ្យុទាក់ទង (walkie-talkies) ការ​រំលោភ​លើវិធានការ​រឹតត្បិត​វីរុសឆ្លងកូរ៉ូណា ការដឹកនាំប៉ះបោរ និងបញ្ហាពុករលួយចំនួនប្រាំពីរករណីផ្សេងទៀត។ សេចក្តីសម្រេចរបស់តុលាការកំពូលកាលពីថ្ងៃពុធ ពុំត្រូវបានប្រកាសជាសាធារណៈនោះទេ។ ប្រព័ន្ធយុត្តិធម៌របស់សហភាពមីយ៉ាន់ម៉ា ដំណើរការដោយ​មានតម្លាភា​ព​តិចតួច ហើយការកាត់ក្តីទាំងអស់​របស់លោកស្រី ស៊ូជី ធ្វើឡើងដោយបិទទ្វារ។