ភ្នំពេញ៖ លោកជំទាវបណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ នាព្រឹកថ្ងៃទី២០ ខែមេសា ឆ្នាំ២០២៣នេះ បានអនុញ្ញាតឲ្យឯកឧត្តម UENO Atsushi ឯកអគ្គរាជទូតជប៉ុន ប្រចាំកម្ពុជាចូលជួបសម្តែងការគួរសម និងពិភាក្សាការងារស្តីពីវិស័យវប្បធម៌ខ្មែរ។

ជាកិច្ចចាប់ផ្តើមលោកជំទាវបណ្ឌិតសភាចារ្យ បានរំលឹកឡើងវិញថា កម្ពុជា-ជប៉ុន មាន​ទំនាក់ទំនង​គ្នាល្អ លើផ្នែកការទូត៧០ឆ្នាំមកហើយ។ ទន្ទឹមនឹងនោះទំនាក់ទំនងជាប្រវតិ្តសាស្រ្ត ក៏មាន​យូរលង់ណាស់​មកហើយដែល តែងតែជួយគ្នាទៅវិញទៅមក ក្នុងអំឡុងពេលមានការលំបាកផ្សេងៗ (ជួយឧបត្ថម្ភគាំទ្រគ្នាទៅវិញទៅមកលើសម្ភារៈបរិក្ខារ និងផ្នែកស្មារតី)។

ក្នុងជំនួបទ្វេរដដែលនេះ ភាគីទាំងពីរ លោកជំទាវបណ្ឌិតសភាចារ្យ ភឿង សកុណា និងឯកឧត្តម UENO Atsushi ​បានសម្តែងការពេញចិត្ត នូវកិច្ចសហប្រតិបតិ្តការលើវិស័យវប្បធម៌ ដែលកំពុងធ្វើ​នាពេលបច្ចុប្បន្ន ​គឺមានការរីកចម្រើនជាលំដាប់។ ក្នុងនោះជប៉ុន មានកិច្ចការងារច្រើន ដោយធ្វើ​ជាសហប្រធាន ICC - Angkor ជាមួយបារាំង ចេញពីកិច្ចការងារនេះ ជប៉ុន ក៏បានជួយ​ជួសជុល​អភិរក្ស ប្រាសាទនៅតំបន់អង្គរ ខេត្តសៀមរាប ក៏ដូចជាកិច្ចការងារមួយចំនួនទៀត នៅតំបន់​ប្រាសាទ​សំបូរគុក ខេត្តកំពង់ធំ។

ក្រៅពីនោះជប៉ុន ក៏មានជាសកម្មភាពផ្លាស់ប្តូរវប្បធម៌គ្នា ទៅវិញទៅមក តាមរយៈក្រុមសិល្បករ សិល្បការិនី កម្ពុជា ទៅជប៉ុន - ជប៉ុន មកកាន់កម្ពុជា និងមានជាមហោស្រពសិល្បៈ មហោស្រពភាព​យន្តផ្សេងៗ ដែលជាសកម្មភាពផ្លាស់ប្តូរវប្បធម៌ជាមួយគ្នា។

ឆ្លៀតក្នុងឱកាសនោះ លោកជំទាវបណ្ឌិតសភាចារ្យ ភឿង សកុណា ក៏បានថ្លែងអំណរគុណ ចំពោះការបន្តគាំទ្ររបស់ជប៉ុន​ ទាំងសម្ភារបរិក្ខារ​ និងស្មារតីផ្សេងៗជូនកម្ពុជា។

ជាមួយគ្នានោះដែរ ឯកឧត្តម ឯកអគ្គរាជទូតជប៉ុន ក្នុងនាមជាសហប្រធាន ICC-Angkor ក៏បាន​ប្តេជ្ញាចិត្ត និងបន្តជួយកម្ពុជា បន្តទៀតលើការងារវប្បធម៌ រួមមានការងារជួសជុលអភិរក្សប្រាសាទ ការគាំទ្រ​គ្នាផ្សេងៗលើឆាកអន្តរជាតិ​ និងសកម្មភាពផ្សេងៗទៀត ​ដែលថាក្រសួងវប្បធម៌ មានបំណងស្នើទៅជប៉ុន គឺជប៉ុន នឹងបន្តគាំទ្រជួយដល់ក្រសួងវប្បធម៌ និងវិចិត្រសិល្បៈ នៃព្រះរាជាណាចក្រកម្ពុជាផងដែរ៕អត្ថបទ រដ្ឋា