ភ្នំពេញ៖ នៅទីស្តីការក្រសួង កាលពីរសៀលថ្ងៃទី១៩ ខែមេសា ឆ្នាំ២០២៣កន្លងទៅនេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានទទួលជួបសម្តែងការគួរសម និងពិភាក្សាការងារជាមួយ លោក ប៊ែរត្រាន់ អាំប្រ៊យ (Bertrand Ambroise) ប្រធាននាយកដ្ឋានទំនាក់ទំនងអន្តរជាតិនៃផ្សារអន្តរជាតិ រ៉ាងហ្គីស (Rungis) ។

ក្រសួងកសិកម្ម រុក្ខាប្រមាញ់ និងនេសាទ នៅក្រោយចប់ជំនួបការងារនេះ បានឲ្យដឹងថា ក្នុងជំនួប​ពិភាក្សានេះ ឯកឧត្តមរដ្ឋមន្ត្រី បានសម្តែងនូវការស្វាគមន៍ចំពោះចំណាប់​អារម្មណ៍ទីផ្សារ​កសិផល​កម្ពុជា និងបានស្នើឱ្យភាគីបារាំង បញ្ជូន​អ្នកជំនាញ​ពាណិជ្ជកម្មមក​ធ្វើការសិក្សាពីសក្តានុ​ពលវិស័យ​កសិកម្មកម្ពុជានិងធ្វើការជាមួយគ្នា ដើម្បីនាំ​កសិផល​កម្ពុជាចូលទៅកាន់ទីផ្សារបារាំង និងការ​នាំ​ទំនិញ​បារាំង​មកកម្ពុជាវិញផងដែរ។ មួយវិញទៀត គឺការចងក្រងបណ្តុំ ការ​បង្កើតទីផ្សារ​កសិផល​មួយដែលឆ្លើយតបនឹងតម្រូវការ និងស្តង់ដាទីផ្សារប្រទេសបារាំង ព្រមទាំងការបណ្តុះបណ្តាល​ធនធានមនុស្សប្រកបដោយសមត្ថភាព ជំនាញច្បាស់លាស់ តាមរយៈអាហារូបករណ៍​និង​កម្មវិធី​ផ្លាស់ប្តូរ​បទពិសោធន៍​ជាដើម ហើយកម្ពុជាមានសាលាជាតិកសិកម្មចំនួនបី សម្រាប់សហការ​លើការបណ្តុះធនធានមនុស្សនេះ។

បើតាមឯកឧត្តមរដ្ឋមន្ត្រី ដើម្បីឱ្យការងារទីផ្សារនេះទទួលបានជោគជ័យ ក្រុមការងារត្រូវស្វែង​យល់ពីទស្សនវិស័យ​ទីផ្សារឱ្យបានច្បាស់លាស់ មានយុទ្ធសាស្ត្រ ផែនការពាណិជ្ជកម្មជាក់លាក់ និងស្វែងយល់ពី​ខ្សែច្រវាក់តម្លៃតាំង​ពីអ្នក​ផលិតរហូតដល់ទីផ្សារ៕ ដោយ ៖ បូរ៉ាវី