ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ កាលពីថ្ងៃទី១៩ មេសា ឆ្នាំ២០២៣ កន្លងទៅនេះ បានបើកប្រជុំស្តីពីការពិនិត្យកញ្ចប់ថវិកា​របស់គម្រោង ដើម្បីគាំទ្រដល់ការរៀបចំមន្ទីរពិសោធន៍ នៅទីស្តីការក្រសួង។

ក្នុងកិច្ចប្រជុំនេះឯកឧត្តមរដ្ឋមន្ត្រី បានណែនាំអំពីគោលដៅរបស់ក្រសួង ដែលចង់បានមន្ទីរ​ពិសោធន៍​កម្រិតស្តង់ដារ​អន្តរជាតិជួយដល់ផ្នែកចំណីអាហារឱ្យមានកម្រិតសុវត្ថិភាពខ្ពស់ ជួយ​ទប់ស្កាត់ជំងឺសត្វ និងជំងឺឆ្លងផ្សេងៗ ដែលចាំបាច់ណាស់ក្នុងការផ្តល់សេវាសាធារណៈជូន​ប្រជាជននៅទូទាំងប្រទេស។

ឯកឧត្តម ឌិត ទីណា បានបញ្ជាក់ជូនអង្គប្រជុំបន្ថែមថា គម្រោងមន្ទីរពិសោធន៍ថ្មីស្ថិតនៅឃុំសិត្បូ ខេត្តកណ្ដាល ជាទីតាំងល្អដែលអាចជួយ​បញ្ចៀស​ហានិភ័យ​ក្នុងករណីមានបញ្ហាណាមួយ​ដែល​អាចប៉ះពាល់ដល់ទីប្រជុំជន។

ទាក់ទងនឹងការងារនេះ ឯកឧត្តម បានណែនាំអង្គប្រជុំ​ ឲ្យយកចិត្តទុកដាក់​ពិនិត្យទាំងមុខងារ គ្រឿងម៉ាស៊ីន ធនធានមនុស្ស ​ចំណេះដឹង​ និងការចំណាយផ្សេងៗ ដើម្បីធានា​ដល់ដំណើរ​ការ​ប្រព្រឹត្តទៅ​បានល្អប្រសើរ ​និងជាមន្ទីរពិសោធន៍លើវិស័យកសិកម្ម។

ដើម្បីឱ្យការងារនេះប្រព្រឹត្តទៅបានរលូន ឯកឧត្តមរដ្ឋមន្ត្រី បានស្នើអង្គប្រជុំធ្វើការបង្កើត​ក្រុមការងារ​មួយ ដឹកនាំដោយ ឯកឧត្តម សេន សុវណ្ណ ដើម្បីពិនិត្យមើលលើ ​បញ្ជីសារពើភណ្ឌ ថវិកាលម្អិត ឧបករណ៍ ​សម្ភារៈ និងធនធានមនុស្ស ​ដោយមានការចូលរួមពីអង្គភាពពាក់ព័ន្ធក្រោមឱវាទ។

ចំណែកការចំណាយ ​ត្រូវពិនិត្យលទ្ធភាពថវិកាសម្រាប់ការជួសជុលហេដ្ឋារចនាសម្ព័ន្ធ និង​សម្ភារៈផ្សេងៗ ដើម្បីបន្តសកម្មភាព ប្រសិទ្ធភាព ​និងនិរន្តរភាពការធ្វើពិសោធន៍។

មួយវិញទៀត មន្ទីរពិសោធន៍ធំ និងមន្ទីរពិសោធន៍តំបន់ ត្រូវមានទំនាក់ទំនង សហការល្អនឹងគ្នា ដើម្បីធ្វើការងារឱ្យបានរហ័ស ​និងទាន់ពេលវេលាក្នុងការផ្តល់សេវាសាធារណៈទូទាំងប្រទេស៕អត្ថបទ៖ ឈិត បូរ៉ាវី