អាមេរិក ៖ កាល​ពី​ថ្ងៃ​ពុធ​ម្សិលមិញ ក្រសួង​រតនាគារ​សហរដ្ឋអាមេរិក បាន​ដាក់​ទណ្ឌកម្ម​បុគ្គល​ម្នាក់ និង​​អង្គភាព​​អាជីវកម្ម ៦កន្លែង ដែល​ជា​បណ្ដាញ​ផ្គត់ផ្គង់​គ្រឿង​បង្គំ​ខាង​យោធា រួម​ទាំង​គ្រឿង​បង្គំ​ប្រើប្រាស់​សម្រាប់​យាន​ដ្រូន​ផង​ដែរ ។

គោលដៅទណ្ឌកម្មនេះ រួមទាំងលោក Mehdi Khoshghadam ដែលជាប្រធានគ្រប់គ្រងក្រុមហ៊ុន Pardazan ​System Namad Arman (PASNA)របស់អ៊ីរ៉ង់ ។

ក្រសួងរតនាគារអាមេរិក និយាយនៅក្នុងសេចក្តីថ្លែងការណ៍ថា លោក Khoshghadam ប្រើប្រាស់​ក្រុមហ៊ុន​បង្កើត​ថ្មី ក្នុង​គោលបំណង​បញ្ចៀសទណ្ឌកម្ម សេចក្តី​ប្រកាស​ទណ្ឌកម្ម​របស់​រតនាគារ​អាមេរិក និយាយថា ដោយប្រើប្រាស់​ក្រុមហ៊ុន​បង្កើតថ្មីជាច្រើន លោក Khoshghadam បានព្យាយាម​ស្វែងរកគ្រឿងបង្គុំអេឡិកត្រូនិកផ្សេងៗ​គ្នាពីក្រុមហ៊ុន​ផ្គត់ផ្គង់​បរទេសដែលមានមូលដ្ឋានសំខាន់នៅសាធារណរដ្ឋប្រជាមានិតចិន ។

យោងតាមការអះអាងរបស់ក្រសួងរតនាគារ បានឲ្យដឹងថា ក្រុមហ៊ុនទាំងនោះ រួមមានក្រុមហ៊ុន Amv AJ Nilgoun Bushehr Co. និងក្រុមហ៊ុន PASNA International ដែលមានមូលដ្ឋាននៅប្រទេសអ៊ីរ៉ង់ ។

លោក Brian E. Nelson គឺជាអនុរដ្ឋមន្ត្រីរតនាគារអាមេរិកទទួលបន្ទុកចារកម្មហិរញ្ញវត្ថុ និងភេរវកម្ម និយាយថា បណ្តាញ​ដែលរងទណ្ឌកម្មនៅថ្ងៃនេះ បានផ្គត់ផ្គង់ទំនិញ និងបច្ចេកវិទ្យាសម្រាប់​រដ្ឋាភិបាលអ៊ីរ៉ង់ និងឧស្សាហកម្ម​ការពារជាតិ​របស់ពួកគេ ហើយនិងកម្មវិធីយានដ្រូន UAV ។ រតនាគារអាមេរិក នឹងបន្តពង្រឹងទណ្ឌកម្មប្រឆាំង​នឹងកិច្ចខិតខំផ្គត់ផ្គង់​យោធាអ៊ីរ៉ង់ ដែលរួម​ចំណែកធ្វើឲ្យមានអសន្តិសុខក្នុងតំបន់ និងអស្ថិរភាពនៅលើសកលលោក ៕ ដោយ ៖ សារ៉ាត់