ភ្នំពេញ៖ សម្តេចពិជ័យសេនា ទៀ បាញ់ ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ និងជាប្រធាន CAMSOC បានអំពាវនាវដល់កងទ័ពទាំងអស់បន្តចូលរួមកាន់តែសកម្មបន្ថែមទៀត ជាមួយក្រសួងស្ថាប័ន សមត្ថកិច្ច ពាក់ព័ន្ធ និងរដ្ឋបាលរាជធានី-ខេត្ត ថែរក្សាការពារសន្តិសុខ សណ្តាប់ធ្នាប់នៅក្នុងព្រឹត្តិការណ៍កីឡាស៊ីហ្គេម ដែលកម្ពុជាធ្វើជាម្ចាស់ផ្ទះ នាពេលខាងមុខនេះ។

ថ្លែងក្នុងកិច្ចសម្ភាសន៍ជាមួយអ្នកសារព័ត៌មាន ក្រោយធ្វើជាអធិបតីភាព ​ក្នុងពិធីបំពាក់ឋានន្តរស័ក្តិ ថ្នាក់ឧត្តមសេនីយ៍ ដល់នាយទាហាននៃកងយោធពលខេមរភូមិន្ទ នាព្រឹកថ្ងៃទី២០ ខែមេសា ឆ្នាំ២០២៣នេះ ​សម្តេចពិជ័យ សេនា ទៀ បាញ់ បានមានប្រសាសន៍ថា កម្ពុជាបានទន្ទឹងរង់ចាំ​អស់​រយៈពេល ៦៤ ឆ្នាំមកហើយ ​ចំពោះការធ្វើជាម្ចាស់ផ្ទះនៅព្រឹត្តិការណ៍​កីឡាស៊ីហ្គេម ដូច្នេះត្រូវ​តែរួមគ្នា​ធ្វើកិច្ចការនេះប្រកបដោយ​ភាព​រលូន​ និងត្រូវតែ ធ្វើការ​តុបតែង​រៀបចំ​ឲ្យបានល្អឲ្យ​សម​ជាម្ចាស់ផ្ទះ ​ដែលនឹងត្រូវធ្វើការទទួលភ្ញៀវនោះ។

សម្តេចពិជ័យសេនា ទៀ បាញ់ បានបញ្ជាក់ថា​ រហូតមកដល់ពេលនេះនៅសល់តែ១៥ ថ្ងៃទៀត​ប៉ុណ្ណោះ​នឹងដល់ថ្ងៃរៀបចំព្រឹត្តិការណ៍ស៊ីហ្គេម ​លើកទី៣២ និងនៅសល់តែ៤៤ថ្ងៃទៀត​ ដល់ថ្ងៃ រៀបចំព្រឹត្តិការណ៍កីឡាអាស៊ានប៉ារ៉ាហ្គេមលើកទី១២។

សម្ដេច ស្នើប្រធានស្ថាប័ន ​មេបញ្ជាការ នាយទាហាន នាយទាហានរង និង​ពលទាហាន​នៃកង​យោធពល​ខេមរភូមិន្ទ ​ចូលរួមគាំទ្រដល់កម្ពុជា​ធ្វើជាម្ចាស់ផ្ទះ ​នូវព្រឹត្តិការណ៍ខាងលើនេះ តាម​រយៈការរៀបចំ​តាក់តែង ធ្វើអនាម័យអង្គភាព​ កន្លែងធ្វើការ​ ផ្ទះ​សម្បែង​ឲ្យ ​មានបរិស្ថានស្អាត ផា​សុខភាព ​មាន​ភាព​ញញឹម​ រាក់ទាក់ ទប់ស្កាត់ការប្រព្រឹត្តគ្រឿងញៀន ​និងអនុវត្តតាម ពាក្យ ស្លោក«ប្រជាជនម្នាក់ លេងកីឡាមួយមុខ» និង«កីឡារស់ក្នុងសន្តិភាព»៕អត្ថបទ៖ បាន ចក់