ភ្នំពេញ​៖ អភិបាលរាជធានីភ្នំពេញជម្រុញឱ្យអាជ្ញាធរខណ្ឌទាំង១៤ និងកម្លាំងមានសមត្ថកិច្ច យកចិត្តទុកដាក់ខ្ពស់បំផុតក្នុងការរក្សាសន្តិសុខ សណ្តាប់ធ្នាប់ ដើម្បីទទួលក្បួនដង្ហែព្រះអគ្គិជ័យកីឡានាពេលខាងមុខ។

​ឯកឧត្តម ឃួង ស្រេង អភិបាលរាជធានីភ្នំពេញ បានជម្រុញឱ្យអាជ្ញាធរខណ្ឌទាំង១៤ និងកងកម្លាំងមានសមត្ថកិច្ចត្រូវយកចិត្តទុកដាក់ឱ្យបានខ្ពស់បំផុត ក្នុងការរក្សាសន្តិសុខ សណ្តាប់ធ្នាប់ ដើម្បីឱ្យក្បួនដង្ហែព្រះអគ្គិជ័យកីឡានៃការប្រកួតកីទ្បាអាស៊ីអាគ្នេយ៍លើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣នេះ ទទួលបាននូវភាពអធិកអធម ខណៈដែលកម្ពុជាត្រូវធ្វើជាម្ចាស់ផ្ទះ។ ការជម្រុញរបស់ ឯកឧត្តម ឃួង ស្រេង បានធ្វើឡើង នៅរសៀលថ្ងៃទី២០ ខែមេសា ឆ្នាំ២០២៣ ក្នុងកិច្ចប្រជុំត្រៀមរៀបចំពិធីដង្ហែព្រះអគ្គិជ័យកីទ្បា នៅសាលារាជធានីភ្នំពេញ។

ឯកឧត្តម ឃួង ស្រេង បានលើកឡើងថា កម្ពុជាបានរងចាំ៦៤ឆ្នាំហើយ ដើម្បីធ្វើជាម្ចាស់ផ្ទះនៃការប្រកួតកីទ្បាអាស៊ីអាគ្នេយ៍នេះ ។ ដូច្នេះទេ អាជ្ញាធរខណ្ឌទាំង១៤ មន្ទីរជំនាញពាក់ព័ន្ធ និងកងកម្លាំងមានសមត្ថកិច្ចទាំងអស់ ត្រូវយកចិត្តទុកដាក់ឱ្យបានខ្ពស់បំផុត។ ចំពោះអ្នកដែលត្រូវដង្ហែ និងអ្នកឈរទទួលក្បួនដង្ហែព្រះអគ្គិជ័យកីឡា គឺត្រូវតែប្រើប្រាស់យុវជន។ បន្ថែមពីនេះការលាងសម្អាតផ្លូវ ការតុបតែងរាជធានីភ្នំពេញឱ្យមានសោភណ្ឌភាព ត្រូវតែអនុវត្តដោយស្មារតីទទួលខុសត្រូវខ្ពស់បំផុតដូចគ្នា។

សូមបញ្ជាក់ថា ពិធីដង្ហែព្រះអគ្គិជ័យកីឡាពីតំបន់អាស៊ាន នឹងចូលមកព្រះរាជាណាចក្រកម្ពុជា តាមច្រកទ្វារព្រំដែនអន្តរជាតិ ត្រពាំងគ្រៀល-ណងណុកឈៀន ខេត្តស្ទឹងត្រែង និងដង្ហែបន្តទៅតាមបណ្តាខេត្តជុំវិញបឹងទន្លេសាប។

ក្នុងនោះ នៅល្ងាចថ្ងៃទី២៨ ខែមេសា ឆ្នាំ២០២៣ខាងមុខនេះ ក្បួនដង្ហែព្រះអគ្គិជ័យកីឡានឹងមកដល់ផ្សារព្រែកអញ្ចាញ ស្ពានទី១២ ព្រំប្រទល់ខេត្តកណ្តាល និងរាជធានីភ្នំពេញ ដែលរដ្ឋបាលរាជធានីភ្នំពេញរង់ចាំទទួលស្វាគមន៍ព្រះអគ្គិជ័យកីឡានៅស្ពានទី១២នោះ ដើម្បីដង្ហែមកវេទិកា

នៅរមណីយដ្ឋានវត្តភ្នំ និងបន្តឆ្ពោះទៅតម្កល់រក្សាទុកនៅវត្តលង្កា ដោយមានរៀបចំពិធីសាសនា និងបាញ់កាំជ្រួចផងដែរ។

នៅព្រឹកថ្ងៃសៅរ៍ ទី២៩ ខែមេសា ឆ្នាំ២០២៣ ព្រះអគ្គិជ័យកីឡាត្រូវដង្ហែពីវត្តលង្កា ឆ្ពោះទៅវិមានឯករាជ្យ និងដង្ហែពីវិមានឯករាជ្យ ឆ្ពោះទៅមុខស្ថានទូតសិង្ហបុរី បន្តទៅខាងមុខអង្គភាពប្រឆាំងអំពើពុករលួយ រួចដង្ហែឆ្ពោះទៅកាន់ខេត្តកំពង់ឆ្នាំង ។ លុះដល់រសៀលថ្ងៃសុក្រ ទី៥ ខែឧសភា ឆ្នាំ២០២៣ ក្បួនដង្ហែព្រះអគ្គិជ័យកីឡាចេញពីទីប្រជុំជនស្គន់ ខេត្តកំពង់ចាម ឆ្ពោះមកកាន់រាជធានីភ្នំពេញវិញចូលក្នុងបរិវេណទីលានបាល់ទាត់នៃពហុកីឡដ្ឋានជាតិមរតតេជោ ដែលជាកន្លែងប្រារព្ធពិធីបើកព្រឹត្តិការណ៍ស៊ីហ្គេមលើកទី៣២ ជាផ្លូវការ៕អត្ថបទ ៖ ប្រាក់ វ៉ាន់ដា