អ្នកនាង DeLovie Kwagala (Papa De) ជាអ្នកថតរូប និងជាសកម្មជនជនជាតិអ៊ូហ្គង់ដាដែលកំពុងរស់នៅប្រទេសអាហ្វ្រិកខាងត្បូង ខណៈមានព័ត៌មានថា សភារបស់ប្រទេសអ៊ូហ្គង់ដា បានអនុម័តសេចក្ដីស្នើច្បាប់ប្រឆាំងនឹងសមាគមន៍អ្នកស្រលាញ់ភេទដូចគ្នា LGBTQ ដ៏តឹងតែងបំផុតមួយរបស់ពិភពលោក។

សេចក្ដីស្នើច្បាប់ ដែលបានអនុម័តកាលពីខែមីនា បានដាក់ទណ្ឌកម្មធ្ងន់ធ្ងរ រួមទាំងការជាប់ពន្ធនាគារ ២០ឆ្នាំសម្រាប់ការ "លើកកម្ពស់" ការស្រឡាញ់ភេទដូចគ្នា និងសម្រាប់ឧក្រិដ្ឋកម្មមួយចំនួន ដែលពាក់ព័ន្ធនឹងការរួមភេទរបស់បុរសស្រឡាញ់ភេទដូចគ្នា គឺទោសប្រហារជីវិត។

ប្រធានាធិបតីលោក Yoweri Museveni ត្រូវតែចុះហត្ថលេខា ប្រើសិទ្ធិជំទាស់ឬបញ្ជូនច្បាប់នេះ ត្រឡប់ទៅសភាវិញក្នុងសប្តាហ៍នេះ។ សេចក្ដីស្នើច្បាប់នេះ ត្រូវបានថ្កោលទោសដោយក្រុមអ្នកដាក់សម្ពាធ និងក្រុមរដ្ឋាភិបាលលោកខាងលិច ដោយនិយាយថា វានឹងធ្វើឱ្យប៉ះពាល់ដល់សិទ្ធិមនុស្ស។

ទំនាក់ទំនងភេទដូចគ្នាគឺខុសច្បាប់រួចទៅហើយនៅក្នុងប្រទេសអ៊ូហ្គង់ដា ប៉ុន្តែអ្នកគាំទ្របាននិយាយថា ច្បាប់ថ្មីដែលកាន់តែតឹងរ៉ឹងជាងមុននោះ គឺធ្វើឡើងដើម្បីដាក់ទោសទណ្ឌកាន់តែទូលំទូលាយលើសកម្មភាពអ្នកស្រលាញ់ភេទដូចគ្នា LGBTQ ដែលពួកគេនិយាយថាជាការគំរាមកំហែងដល់តម្លៃប្រពៃណី នៅក្នុងប្រទេសអាហ្វ្រិកខាងកើតអភិរក្សនិយម និងប្រកាន់ជំនឿសាសនាតឹងរ៉ឹង។