ភ្នំពេញ៖សម្តេចតេជោ ហ៊ុន សែន នាយករដ្ឋមន្រ្តីកម្ពុជា បានលើកទឹកចិត្តឱ្យថ្នាក់ដឹកនាំខេត្តក្វាងស៊ីប្រទេសចិនជម្រុញកិច្ចសហការរវាងចិននិងកម្ពុជាឱ្យកាន់តែស៊ីជម្រៅនិងអនុវត្ត កិច្ចព្រមព្រៀងដែល មានស្រាប់នោះឲ្យបានគ្រប់ជ្រុងជ្រោយ។

ក្នុងឱកាសអនុញ្ញាតឱ្យឯកឧត្តម Lan Tianli អភិបាលតំបន់ស្វយ័តជនជាតិជាំង ខេត្តក្វាងស៊ី នៃសាធារណរដ្ឋប្រជាមានិតចិន ចូលជួបសំដែងការគួរសម និងពិភាក្សាការងារ នៅវិមានសន្តិភាព នារសៀលថ្ងៃទី២០ ខែមេសា សម្តេចតេជោ ហ៊ុន សែន បានផ្ដល់អនុសាសន៍ឲ្យឯកឧត្តម ធៀនលី បន្តកិច្ចសហប្រតិបត្តិការដែលមានស្រាប់ ឱ្យកាន់តែស៊ីជម្រៅថែមទៀត។

នេះបើតាមការឱ្យដឹងពីឯកឧត្តម អ៊ាង សុផល្លែត ជំនួយការផ្ទាល់សម្តេចតេជោនាយកេដ្ឋមន្ត្រី។

ឯកឧត្តម បានបន្តឱ្យដឹងថា៖នៅក្នុងជំនួបនេះឯឧ Lan Tianliបាន គោរពជូនពរសម្ដេចតេជោ ដោយសូម ឱ្យទេវតាឆ្នាំថ្មីតាមជួយបីបាច់ ថែរក្សា និងប្រសិទ្ធិពរជ័យ បវរមហាប្រសើរជូនចំពោះសម្ដេចតេជោ និងសូមឱ្យសម្ដេចតេជោមានសុខភាពល្អបរិបូរណ៍ កម្លាំងមាំមួន ជន្មាយុយឺនយូរ វិបុលសុខនិងសិរីសួស្តីជ័យមង្គល និងសូមគោរពវាយតម្លៃខ្ពស់ចំពោះការអភិវឌ្ឍន៍របស់កម្ពុជា។

ឯកឧត្តមបានមានថា៖ឯកឧត្តមបានមកកម្ពុជាកាលពីឆ្នាំ២០១៦ តែពេលនេះឯឧបានឃើញកម្ពុជាមានការរីកចម្រើន យ៉ាងខ្លាំងមានអគារខ្ពស់ៗ ប្រជាជនមានជីវភាពធូរធារនិងរីករាយ ហើយ ឯកឧត្តមក៏សូមគោរពសម្ដែងនូវការអបអរសាទរចំពោះការរីកចម្រើននេះ។ទន្ទឹមនេះ ឯកឧត្តមបានគោរពជម្រាបជូនសម្ដេចតេជោថា ដំណើរទស្សនកិច្ចរបស់ឯកឧត្តមមកកាន់ព្រះរាជាណាចក្រកម្ពុជានៅពេលនេះ មានបំណងបី៖ទីមួយគឺ គោរពថ្លែងអំណរគុណជូន ចំពោះសម្ដេចតេជោដោយផ្ទាល់ ដែលដរាបរៀងមកបានគាំទ្រតំបន់ស្វយ័តក្វាងស៊ី ជាពិសេសគាំទ្រការរៀបចំពិព័រណ៍ចិនអាស៊ាន នៅទីក្រុងណាន់នីង។

ទី២. ជំរុញការអនុវត្តកិច្ចព្រមព្រៀងរវាងថ្នាក់ដឹកនាំកំពូលចិន-កម្ពុជា ជាពិសេស ការកសាងសហគមន៍ជោគវាសនារួមចិន-កម្ពុជានិងទី៣. គោរពសុំអនុសាសន៍ដ៏ខ្ពង់ខ្ពស់ពីសម្ដេចតេជោ ដើម្បីពង្រឹងកិច្ចសហប្រតិបត្តិការរវាង ប្រទេសទាំងពីរឲ្យកាន់តែរឹងមាំថែមទៀត។

ជាការឆ្លើយតប សម្ដេចតេជោបានឯកភាពនិង ថ្លែងអំណរគុណចំពោះការ វាយតម្លៃលើទំនាក់ទំនងរវាង ប្រទេសទាំងពីរកម្ពុជា-ចិន។ សម្ដេចបានផ្ដល់អនុសាសន៍ឲ្យឯកឧត្តម ធៀនលី បន្តកិច្ចសហប្រតិបត្តិការដែលមានស្រាប់ ឱ្យកាន់តែស៊ីជម្រៅនិងអនុវត្ត កិច្ចព្រមព្រៀងដែល មានស្រាប់នោះឲ្យបានគ្រប់ជ្រុងជ្រោយ៕