ភ្នំពេញៈ ឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡាបានកំណត់លក្ខណៈចំនួន ៥ ដើម្បីដោះស្រាយគម្លាតជំនាញ ក្នុងប្រទេសកម្ពុជាតាមរយៈការអប់រំបច្ចេកទេសជាប្រព័ន្ធ។

ឯកឧត្ដម ហង់ជួន ណារ៉ុន បានកំណត់បែបនេះតាមរយៈ សិក្ខាសាលាស្ដីពី ការដោះស្រាយគម្លាតជំនាញក្នុងប្រទេសកម្ពុជាតាមរយៈការអប់រំបច្ចេកទេសជាប្រព័ន្ធនារសៀលថ្ងៃទី២០ ខែមេសា ឆ្នាំ២០២៣នេះ។

សិក្ខាសាលានេះមានចូលរួមដោយជាអធិបតីភាពដោយ ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណៈការ និងដឹកជញ្ជូន និងឯកឧត្តមបណ្ឌិតសភាចារ្យ ហង់ជួន ណារ៉ុន រដ្ឋមន្ត្រីក្រសួងអប់រំ និងមានមានការអញ្ជើញចូលរួមពី International Business Chamber of Cambodia (IBC) World Economic Forum (WEF) ស្ថានទូតអង់គ្លេសប្រចាំកម្ពុជា និងដៃគូអភិវឌ្ឍនានា។

ឯកឧត្ដម ហង់ជួន ណារ៉ុន បានថ្លែងថា ក្រសួងអប់រំ យុវជន និងកីឡា បានកំណត់លក្ខណៈចំនួន ៥ ដើម្បីដោះស្រាយគម្លាតជំនាញរួមមាន ទី១.គោលនយោបាយរបស់រដ្ឋាភិបាល និងកំណែទម្រង់សាលារៀន ចាំបាច់ដើម្បីអភិវឌ្ឍជំនាញទន់ និងជំនាញសតវត្សរ៍ទី ២១។ ទី២.កម្មវិធីសិក្សាដែលអាចបត់បែនបាន ហើយភ្ជាប់ទៅនឹងអាជីព។ ទី៣.សាលារៀន និងសាកលវិទ្យាល័យជាមជ្ឈមណ្ឌលមួយនៅក្នុងប្រព័ន្ធអេកូឡូស៊ីសហគ្រិនភាព៖ វេទិកាសម្រាប់ការប្រកួតប្រជែងដើម្បីភ្ជាប់ការអប់រំទៅនឹងពិភពពិត។ ទី៤.ការប្រកួតប្រជែងគំរូធុរកិច្ចដោយមានការចូលរួមពីវិស័យឯកជន ពិតមានប្រយោជន៍សម្រាប់សិស្សានុសិស្សក្នុងការស្វែងយល់ពីរបៀបដោះស្រាយបញ្ហាប្រឈមនៃសតវត្សរ៍ទី២១។ ទី៥.ការតភ្ជាប់ផ្នែកសាកលវិទ្យាល័យ ជាមួយនឹងផ្នែកធុរកិច្ច ដើម្បីលើកកម្ពស់គម្រោងរួម និងការស្រាវជ្រាវ៕